Тыва Республиканың Көдээ ажыл-агый болгаш аъш-чем яамызының коллегиязының хуралы июль 14-те болган. Ооң ажылынга ТР-ниң Чазааның Даргазының оралакчызы Уран-оол Ондар, кожууннар чагыргаларының даргалары, көдээ ажыл-агый эргелелдериниң удуртукчулары киришкен.
Коллегия хуралының хүн айтырыы: Тыва Республиканың Көдээ ажыл-агый болгаш аъш-чем яамызының 2026 чылдың бирги чартыында ажылының түңнелдери болгаш 2026 чылдың ийиги чартыында кол сорулгалары.
Хүн айтырыының талазы-биле илеткелди ТР-ниң көдээ ажыл-агый сайыды Юрий Оруспай кылган. 2026 чылдың бирги чартыында ажылдың түңнелдериниң дугайында чугаалап тура, сайыт Тываның көдээ ажыл-агыйының кол адыры мал ажылында байдалга доктааган. Эрткен 2025 чылда агаар-бойдус кааңдаашкынныг болза-даа, көдээниң ажыл-ишчилери кыштаглаашкынга уткуштур мал чемин четчири-биле курлавырлап ап шыдаанындан 2025–2026 чылдарның кыжын мал хүр ашканын демдеглээн. Мал бажының саны ниитизи-биле көвүдээнин база илеткелинге ол айыткан. Чижээлээрге, шээр малдың баш саны 2026 чылдың январь айда байдал-биле алырга, 607 муң турган болза, июль айның эгезинге чедир санаашкыннар ёзугаар бо чылын төрүттүнген анай-хураганнар-биле кады 894 муң четкен. Бода болгаш чылгы малдың баш саны база көвүдээн.
Малдың чүгле баш санын көвүдедиринче эвес, ооң продуктулуун көдүрер сорулга-биле уксаажыдылга ажылын күштелдирген. Малчын ажыл-ишке, амыдырал-чуртталгага хөй кижилерни хаара тудар, малчыннарга бүгү талалыг дузаны күштелдирери-биле 2026 чылдың ийиги чартыында “Хойжу” төлевилелди ажылдап кылыр, ону боттандырар талазы-биле ажылды 2027 чылда эгелээр.
“Тыва Республиканың Көдээ ажыл-агый болгаш аъш-чем яамызының 2025 чылда ажыл-чорудулгазының түңнелдериниң болгаш 2026 чылда ажыл-чорудулгазының угланыышкыннарының дугайында” ТР-ниң Чазааның 2026 чылдың май 18-те доктаалы-биле кол угланыышкыннар тодараттынганын Юрий Оруспай демдеглеп, келир үеде кол угланыышкыннар дугайында чугаалаан. Олар дээрге тараа болгаш мал чеми тарып өстүрерин көвүдедири, суггарылга четкилерин сайзырадыры дээш өске-даа угланыышкыннар.
2025 чылда, 2026 чылдың бирги чартыында кылып чоруткан ажылдарның, чедиишкиннерниң болгаш көдээниң ишчилериниң мурнунда сорулгаларның дугайында яамының коллегия хуралынга чугаалашкан.
/ Ш. МОҢГУШ.
“Шын” №27 2026 чылдың июль 16
"Шын" солуннуң МАХ-каналынга каттыжыңар: max.ru/channel_shyn