Делегей чергелиг IV буддийжи шуулган үезинде үш регионнуң удуртукчулары Владислав Ховалыг, Бату Хасиков болгаш Алексей Цыденов ужурашкан. Ажыл-агыйжы ужуражылганың түңнелинде – аңгы-аңгы чоннарны база күрүнелерни каттыштырып аралаштырар шөл кылдыр ажыглаары-биле делегей чергелиг буддийжи шуулганны ам-даа улаштырып, улам-дам хөгжүдери чугула деп түңнелге келгеннер.
Сарыг шажынны кол чүдүлге деп санап турар Россияның үш регио- ну – Тываның, Калмыкияның, Бурятияның удуртукчулары медицина болгаш өөредилгеден эгелээш, делегей харылзааларын тургузарынга чедир хөй адырларны экижидер арга-шинээн чугаалашкан.
Владислав Ховалыг коллегалары-биле чугаа үезинде чүдүлгениң социал ужур-уткалыг ажыл-чорудулгазын деткиир талазы-биле «Буддийжи триаданың» регионнар аразында кады ажылдажылга чүгле быжыгар дээрзинге бүзүрелин илереткен. Шуулган дугайында чугаалап ора, 20 аңгы чурттан киржикчилерни чыгганын ол чугаалаан. Бо хүнде ол чүгле авторитеттиг эксперттерниң чыглыр, чаа идеялар төрүттүнер чери эвес, а солун болгаш ажыктыг төлевилелдерни үндүрер платформа апарган. Тодаргайлаарга, шуулганга белеткел үезинде Тывага Россияның бир дугаар буддийжи университедин — «сарыг шажынның» чүдүлге баштыңнарының альма-материн тургузарының дугайында бодал тыптып келген.
Эрге-чагырга биле буддийжи ниитилел амыдыралдың дыка хөй адырларында чаңгыс аай чүүлдери хөй. Чижээлээрге, Россияның этниктиг бөлүктериниң культурлуг бот-тускайлаңын кадагалап арттырары, айыыл-халапка таварышкан улуска ачы-буян болгаш дуза чедирери, чаңчылчаан үнелиг чүүлдерни – кээргээчел чорук, бот-боттарынга дузалажыры болгаш ниитилелге бараан болуру дээн ышкаш чүүлдер хамааржыр.
Бурятияның Баштыңы Россияның өске-даа омак-сөөктүг чоннарын буддизм болгаш ооң үнелиг чүүлдери-биле таныштырар дугайында бодунуң бодалы-биле, база үлешкен. Чижээлээрге ук айтырыгга хамаарыштыр сарыг шажын-биле холбашкан объектилер болгаш онзагай черлер дугайында онлайн-гидти ажылдап кылырын Алексей Цыденов саналдаан. Ооң чугаазы-биле алырга, ындыг төлевилелдер Бурятияда турисчи угланыышкын кылдыр боттанып эгелээн.
2023 чылдан эгелеп делегей чергелиг буддийжи шуулган эртип турар. Ооң сорулгазы – буддизмниң хөгжүлдезинде амгы үениң айтырыгларын сайгарып, делегей чергелиг кады ажылдажылганы быжыглаары, культуралар аразында харылзааны деткиири болур. Шуулганның болур чери чыл санында аңгы-аңгы. Баштайгы ийи шуулган 2023, 2024 чылдарда Бурятияга, үшкүзү 2025 чылда Калмыкияга болган. 2026 чылда делегей чергелиг IV буддийжи шуулганны Тыва бир-ле дугаар эрттирип турары бо.
Бистиң корр.
Чиңгис СААЯНЫҢ тырттырган чуруктары.
«Шын» №32 2026 чылдың август 20
"Шын" солуннуң МАХ-каналынга каттыжыңар: max.ru/channel_shyn