Президентиниң эгелеп кааны «Маадырлар үези» төлевилелге дүүштүр кылган Тыва Республиканың Баштыңының эгелээни «Тываның маадырлары» төлевилелдиң баштайгы 30 доозукчузу профессионал эде белеткел дугайында дипломнарны холунга алган. Байырлыг хемчег июль 30-де Аныяктар ордузунга болуп эрткен. Аңаа Чазак Даргазының оралакчызы Артына Бузур-оол, Дээди Хуралдың Даргазы Каң-оол Даваа, Тываның күрүне университединиң ректору Ольга Хомушку болгаш өске-даа аалчылар киришкен.
Байырлалды Эрик Норбунуң сөзүнге Аяна Монгуштуң бижээни «Даглыг Тывам» деп ырызын үжен маадыр хор-биле ырлап ажыткан. Дүүнгү кадыг-дошкун фронтучу амыдыралын тайбың үеде чаа-чаа ажыл-херектер бүдүржүрүнче угландырып, Төрээн чуртунуң хөгжүлдези дээш бараан болурунга белен маадырларга дипломнарны ТывКУ-нуң ректору Ольга Хомушку биле оралакчы дарга Артына Бузур-оол тывыскан. Улаштыр күрүне шаңналдарын тыпсыр ёзулал болган. Дээди Хуралдың Даргазы Каң-оол Даваа байыр чедирип, төлевилел киржикчилерин хүндүлел бижиктер-биле шаңнаан. Маадырларның өмүнээзинден төлевилел киржикчилери Кылаң-оол Конгар биле Байлак Ондар өөрүп четтиргенин илереткен.
«Мээң Россиям» деп вальс-биле байырлалды төндүрүп, улаштыр сагыш-сеткилин үндүр чугаалашпышаан, арга-дуржулгазын солчур фуршетти организастап кааны эптиг болган.
/ Н. КУУЛАР.
Авторнуң тырттырган чуруу.
“Шын” №25 2026 чылдың июль 2
"Шын" солуннуң МАХ-каналынга каттыжыңар: max.ru/join/egenQ...