1. Элээн каш аяк чуур губканы өттүргеш, соодукчуга каш шак иштинде суп каар. Кажан доңа бээрге, аксын хааптар тускай дижилиг хаптарга суккаш, соодукчу-сумканың иштинге соок температураны үр тудуп, шилде суг чылывазын, мороженое эривезин дээш, суп алыр. Азы изигде хавакка, моюнга, эгиннерге дээртип, серииттенип база болур.
2. Суксун сериин болзун дээш, өл аржыылды ажыглаар. Чаңгыс катап ажыглаар аржыылдар азы салфеткалар болза улам эки. Ону сугга өттүргеш, суксуннуг шилди ооң-биле ораапкаш, соодукчуже 15 минута дургузунда сугар. Бусталган шык суксунну дүрген соодуптар.
3. Суксунну оон-даа дүрген соодар деп бодаар болза, тавакка бичии дөрбелчин доштарны ургаш, хөй эвес сугдан кудупкаш, улуг шопулак ишти дусту уруптар. Дош хөй болза улам эки. Ооң соонда суксуннуг шилди ооң иштинче көзүлбес кылдыр супкаш, элээн каш катап шопулак-биле былгаар. Дус температураны оон-даа чавызадыптарга, дош биле дус холумаа суксуннуң чылыын дүргени-биле бодунче сиңирип алыр. Каш-ла минута дургузунда он хире градус чедир соодуптар.
4. Калбак тавакка дөрбелчин доштарны ургаш, ажылдап турар вентилятор чанынга салып каар. Агаар дош таварыштыр эрткеш, оон-даа сериин болур. Доштуг тавактың орнунга улуг чук шилде доңуруп каан суг база болур.
5. Шилге арыг сугну куткаш, соодукчугга чыттыр салып каар. Элээн каш шак эрткенде, ынаар сугну, сокту, соок шайны азы кофени кудуп ап болур. Дош чоорту эривишаан, савада суксунну соодуп турар болур.
6. Соодукчуже лосьонну суп кааш, хүнде элээн каш катап ажыглаар. Ол кончуг сериидедир. Оон аңгыда соодукчуже крем, арын аштаар тоник, пөс болгаш хөй катап ажыглаар арынга гельдиг маскалар, карак долгандыр чыпшырар патчилер дээш өске-даа чүүлдерни соодукчулап ап болур. Изиг хүнде ону ажыглаарга, дендии аянныг.
7. Сыртык хавын удуур мурнунда бир шак бурунгаар соодукчуже суп каар. Ол чайның ышкам дүнелеринде кончуг ажыктыг. Болдунар болза, бүдүн сыртыкты-даа соодукчулап болур.
Чурукту ГигаЧатка чураан.
“Шын” №29 2026 чылдың июль 30
"Шын" солуннуң МАХ-каналынга каттыжыңар: max.ru/channel_shyn