Июль 10-да Тываның Баштыңы Владислав Ховалыг регионнуң эң-не ыраккы кожууну Мөңгүн-Тайгаже ажыл-агыйжы сургакчылаашкынга чорааш келген.
Бо чайын Мөңгүн-Тайга кожууннуң Кызыл-Хая сумузунда чаа школаны болгаш стадионну тудуп турар. Бичии суурга шак ол тудуглар улуг болуушкун апарганы чугаажок. Тываның Баштыңы тудугларны көрген соонда, кожууннуң школа, уруглар садтары, эмнелгелер дээн ышкаш социал объектилеринге доозазынга четкеш, улаштыр «Мөген-Бүрен» болгаш «Дизель» бүдүрүлге черлеринге база аалдап четкен. Оон ыңай культура одаанга чыглып келген тус черниң чонунуң сонуургааны айтырыгларынга харыылаан.
«Идегелдиг электрижидилге, шынарлыг оруктар болгаш көдээ ажыл-агыйның хөгжүлдези чаңгыс чер чурттугларывысты, шынап-ла, дүвүредип турар-дыр. Шиитпирлээр айтырыглар хөй, ынчалза-даа ол бүгүнү ээлчег ёзугаар бичиилеп чогудуп чоруп орар бис. Тус черниң чурттакчы чонунуң бичии-даа болза эки талаже өскерлиишкиннерни, чаартылгаларны эскерген үнелели – бистиң командавыска ам-даа күжениишкинниг ажылдаарынга идиг болду» – деп, Владислав Ховалыг кызыл-хаяжылар-биле ужуражылгазының дугайында МАХ-та бодунуң хууда блогунга демдеглээн.
Сумунуң чурттакчы чону бодунуң ээлчээнде оларның дилээнге кичээнгейни салып турары дээш, база Тываның Баштыңының чүгле Кызыл-Хаяны эвес, а бүгү регионну хөгжүдер дээш кылып чорудуп турар ажылын, күжениишкинин үнелеп, деткип турарын илереткеннер. Ылаңгыя оптоволокнолуг харылзаа шугумун узадып, интернет шугуму киирер дугайында медээ Кызыл-Хаяның аныяктарынга өөрүнчүг болган. Ажыл үргүлчүлеп турар. 2027 чылда интернет шугуму бүрүнү-биле ажылдай бээр ужурлуг.
/ Бистиң корр.
Чуруктарны ТР-ниң Чазааның парлалга албанындан алган.
“Шын” №27 2026 чылдың июль 16
"Шын" солуннуң МАХ-каналынга каттыжыңар: max.ru/channel_shyn