Чаштарга чаарттынган уруглар сады
Барыын-Хемчиктиң Кызыл-Мажалыкта “Чечек” уруглар садында капиталдыг септелге чоруп турар. Уруглар албан чериниң бо септелгези “Өг-бүле” национал төлевилелдиң “Өг-бүлеге деткимче” федералдыг программазының боттанылгазынга хамааржыр.
2026 чылдың июль 22-ниң байдалы-биле уруглар оран-савазының соңгаларын чаарткан болгаш шалазын солуур, эрги серизин бузар ажыл уламчылап турар. Ол ышкаш объектиниң иштики септелге ажылдарын шынарлыг материалдар-биле кылып турар.
Оон аңгыда национал төлевилелдиң боттанылгазы-биле уруглар албан черинге чүгле септелге ажылдарын кылырындан аңгыда, материал-техниктиг баазазын база чаартыры көрдүнген. Септелге доостурга, уруглар садынга чаа үениң негелдезинге дүүшкен ойнаар шөлчүгештер, уруглар ойнадыр чаа комплекстерни салыр.
Аржаан девискээрин боктан арыглаан
Эрткен хүннерде Эрзинниң Качык сумузунуң удуртулгазы «Дархи» аржаанның девискээрин аштаарынче аныяктарны мөөңнээн. Тургузукчу күш-ажылдың болгаш өг-бүле ыдыктарының чылында сумунуң база бир эм шынарлыг ыдыктыг аржаанының девискээрин аштаар субботникке киришкен аныяктарга төрээн черинге хумагалыг болурунга, моон-даа соңгаар салгалдан салгалче кадагалап арттырарынга улуг ужур-уткалыг болган.
Субботник киржикчилери бок-сүрээ аштаарындан аңгыда, аржаанда турар субурганны чаартып, будааш, аржаанчыларга шывыглыг дыштаныр черлерни немей кылган болгаш бок октаар контейнерлерни салган.
Аржаан суурда чаа Мани хүртү
Июль 27-де Аржаан сумузунда «Таарымчалыг хоорай хүрээлеңин хевирлээри» федералдыг төлевилелдиң боттандырылгазы-биле чаагайжыттынган үшкү хөй-ниити девискээри ажыттынган.
«Цеченлинг» хүрээзинден Чамбал башкыга удурткан лама башкылар Мани хүртүзүнүң байырлыг ажыдыышкынынга улуг мөргүлдерни номчуп, арамайлаашкын ёзулалын эрттирген.
Бии-Хемниң чагырга даргазының хүлээлгезин күүседип турар Алдай-Мерген Ховалыг, кожуун баштыңы Андрей Бородкин, «Кристалл Плюс» кызыгаарлаттынган харыысалгалыг ниитилелдиң чиңгине директору Александр Куницын, суму чагырыкчылары, салым-чаяанныг скульптор болгаш чурукчу өг-бүле Чаян Шагбажаа биле Лариса Данзырын дээш өске-даа аалчылар аржаанчыларга байыр чедирген. Олар Тывада чылдың кол болуушкуннарының бирээзи – делегей чергелиг IV сарыг шажын шуулганы болур чылда, кожуунда ыдыктыг черлер немежип турарын онзалап демдеглээн.
Ол ышкаш элээди мөгелер аразынга хүреш, ча адар база баскетбол маргылдаалары болуп эрткен. Аңаа кожууннуң спортчулары идепкейлиг киришкен.
Объектини «Кристалл Плюс» кызыгаарлаттынган харыысалгалыг ниитилел чаагайжытканын сагындыраал.
85 чыл оюн демдеглээн
Июль 25-те Мөңгүн-Тайга кожууннуң төп эмнелгези тургустунганындан бээр 85 чыл оюн демдеглеп эрттирген. Аңаа тураскааткан байырлыг хемчегге кожууннуң чону идепкейлиг киржип, ак халат кеткен буянныг ажыл-ишти кылып чоруурларга четтиргенин илередип, солун концерт, оюн-тоглаалыг байырлаан. Ол ышкаш хөй чылдар дургузунда чоннуң кадыы дээш дүн-хүн чок ак сеткилдиг ажылдап чораан эмнелгениң хоочуннарынга болгаш эки ажылдыг аныяк эмчилеринге, эмчи сестраларынга, өске-даа ажылдакчыларынга аңгы-аңгы чаданың шаңналдарын тывыскан.
/ Медээлерни болгаш чуруктарны кожууннарның чагырга черлериниң социал четкиде арнындан алган.
“Шын” №29 2026 чылдың июль 30
"Шын" солуннуң МАХ-каналынга каттыжыңар: max.ru/channel_shyn