Арыг-силиг дүргенчилер
Эрткен дыштаныр хүннерде Таңды кожууннуң Дүрген сумузунга субботникти организастаан. Сумунуң Шоссейная кудумчузунда 2024 чылда «Таарымчалыг хоорай хүрээлеңин хевирлээри» национал төлевилел-биле туттунган хөй-ниити девискээрин аштап-арыглаан.
Субботникке Таңды кожуун чагыргазының ажылдакчылары, Валентин Алексеевич Момбей-оолдуң өг-бүлези база аныяктар болгаш школачылар: Айыжы, Алдар, Дүгер, Руслан, Диана, Сайдаш, ол ышкаш Сосновка школазының 8 «б» клазының өөреникчилери киришкен.
Валентин Алексеевич Момбей-оолдуң деткээни техниказынга ийи УАЗ машина ишти бокту үндүр дажаан.
Улуг даштардан арыглаан
Мөңгүн-Тайга кожуунга база Бүгү-российжи субботниктер болгулаан. Чаагайжыдылга ажылдарынга кожууннуң 280 ажыг чурттакчызы киришкен: албан черлериниң ажылдакчылары, школаларның өөреникчилери, тус черниң чурттакчылары.
Субботниктиң кол сорулгазы — кудумчуларның овур-хевирин үреп турар база орук шимчээшкининге бергедээшкиннер тургузуп турар улуг даштардан арыглаары. Чоннуң демниг чоруу-биле дыка хөй арыглаашкын ажылдары кылдынган. Кожууннуң чагырга чери субботникке идепкейлиг киришкен, үлүг-хуузун киирген чонга өөрүп четтиргенин илереткен.
Камгалал дилиглерни чардырган
Тывада арга-арыг болгаш хову-шөлдерниң өрттериниң саны көвүдээнинден регионалдыг чазактың шиитпири-биле киирген өртке удур тускай чурум апрель 15-тен эгелеп күш кирген.
Онза чурумну чарлаан соонда, ОБЯ эргелелиниң күштери-биле апрель 14-тен эгелеп арга-арыг өрттеринге таваржып болур айыылдыг черлерде суурларның өртке удур айыыл чок чоруунуң байдалын хынап эгелээн.
Улуг-Хем кожууннуң девискээринде суурларны, чевеглерни долгандыр өрттен камгалал дилиглерни апрель 21-26 хүннеринде шупту сумулар чардырып дооскан. Негелде езугаар камгалал дилиг 10 метрден эвээш болбас ужурлуг.
Кожуунда 196 малчын коданнар бар, хуу малчыннар боттарының девискээрин база өрттен камгалал дилиндекти чардырып алыры чугула.
Тожуга спартакиада
Апрель 24-те Тожу кожуунга ажылчын коллективтер аразынга спартакиада болуп эрткен.
Спартакиаданың бирги ке- зээ — спортчу оюннар болган. Аңаа 5 команда киришкен. Түңнелинде 1-ги черге өөредилге эргелелиниң «Триколор» командазы төлептиг болган, 2-3-кү черлерге чагырга чериниң «Дружба» биле культура эргелелиниң «Культурлуг микробтар» командалары тергиидээн.
Дартс оюнга эр улус аразынга Айдың Сундуй бирги чер, Сергей Энчейбен ийигизин, Сайын Кол үшкү чер алгаш, часпас адыгжылар болган. Херээжен улус аразынга Надежда Дугур бирги черни, ийигизин Айлаң Думендей, үшкүзүн Солангы Бичиш алганнар.
Спортчу оюннарга тергиидээннерни шаңнап-мактаан соонда, ийиги кезээ — субботник эгелээн. Спортчу херекселдерни дырбааш, хүүрек-биле солааш, кым-даа чанмайн, ажылдап кирипкеннер. Тожужулар демин көргүзүп, ол чоок-кавының девискээрин кыштаан бок-күзүрүмден аштап-арыглаан.
Медээлерни болгаш чуруктарны кожууннар чагыргаларының социал четкиде арыннарындан алган.
“Шын” №16 2026 чылдың апрель 30
"Шын" солуннуң МАХ-каналынга каттыжыңар max.ru/join/egenQ...