Кызылдың А.Б. Чыргал-оол аттыг уран чүүл колледжинге тыва культураның хүндүлүг хоочуну, билдилиг башкы, дуржулгалыг удуртукчу, РФ-тиң база Тыва Республиканың культуразының алдарлыг ажылдакчызы Виктор Нагорныйның 80 харлаан юбилейинге тураскааткан байырлыг концерт болуп эрткен.
Аңаа Тыва Республиканың Чазак Даргазы Владислав Ховалыг, ТР-ниң культура сайыды Виктор Чигжит, республиканың культура албан черлериниң бүгү удуртукчулары, православ шажын чүдүлгениң төлээлери, Тывада билдингир культура ажылдакчылары, колледжтиң башкылары болгаш сургуулдары база чалаттырган хөй аалчылар киришкен.
Байырлыг хемчегниң эгезинде чарлакчы сөс алыр мурнунда, Тыва Республиканың Чазак Даргазынга катап база соңгутканы дээш, Владислав Ховалыгга байыр чедирерге, чыылганнар тура изиг адыш часкаашкыннары-биле деткээн.
ТР-ниң Чазак Даргазы сөс алгаш, Виктор Васильевич Тываның хөгжүм болгаш уран чүүл талазы-биле өөредилгезиниң быжыг таваан тургускаш, чаңгыс эвес салым-чаяанныг, профессионал бедик мергежилдиг хөгжүмчүлер салгалын кижизидип, доостурганын, олар шупту бо хүнде Тываның чоргааралы апарган деп улуг хүндүткел-биле демдеглээн. Ол ышкаш 30 чыл үзүктел чок удуртукчузу кылдыр ажылдаан төрээн училищезинге байыр чедирип келгенинге Владислав Ховалыг өөрүп, быжыг кадыкшылды, бүгү-ле чүүлдеринге экини күзээш, ооң Тыва Республиканың культуразының хөгжүлдезинге киирген үлүг хуузун бедии-биле үнелеп турарының демдээ болган “Тыва Республиканың мурнунга ачы-хавыяазы дээш” деп медальды тывыскан.
ТР-ниң Культура яамызының мурнундан Виктор Чигжит байыр чедиргеш, “Тыва Республиканың культуразының тергиини” хөрек демдээ болгаш 100 муң рубльдиң сертификадын тывыскан.
“Тываның Баштыңы Владислав Ховалыгның тывыскан шаңналы Виктор Васильевичиниң хөй чылдар дургузунда культура адырынга кылып келген ажыл-амыдыралын бүрүнү-биле бадыткап турар. Бис, Тываның бүгү культура албан черлериниң удуртукчулары, шупту ону хүндүткел-биле үнелеп, деткип тур бис” – дээш, байыр чедириишкиннеринге ТР-ниң Национал музейиниң директору, эртемден Каадыр-оол Бичелдей бүгү удуртукчуларны баштап үнүп келгеш, улашкан.
Ол ышкаш В.В. Нагорный-биле хөй чылдарда училищеге кады ажылдаан, амгы үеде Тывадан дашкаар чурттап чоруур башкылар видео таварыштыр байыр чедириишкиннерин база кылган.
Байырлыг концертке сценаже үнген артист, хөгжүмчү бүрүзү шупту В.В. Нагорныйның өөреникчилери, шагда-ла хөйге билдингир апарган алдарлыг артистер, хөгжүмчүлер башкызынга аян ырын ырлап, хөгжүм аялгалыг байыр чедириишкиннерин үзүктел чок кылганнар. Олар шупту чүгле мастерниң чоргааралы, байлаа эвес, бүгү Тываның чоргааралы, иштики-даштыкыга төрээн республиказын алдаржыдып чоруур артистеривис-тир. Бүдүн оркестрлер – Тываның национал оркестри, ТР-ниң Чазааның үрер хөгжүм оркестри, Орус хөгжүм оркестри, “Алаш” бөлүү, ”Кант” болгаш “Тываның баянистери” ансамбльдер, колледжтиң “Азас” танцы бөлүү болгаш В.В. Нагорныйның деткимчези-биле уран чүүл училищезинге ажыттынган тыва хөгжүм херекселдер клазының эң баштайгы доозукчуларының бирээзи, Тываның улустуң хөөмейжизи Андрей Монгуш башкызынга эки күзээшкиннерни чугаалап, хөгжүмнүг байырын чедиргеннер.
Хөй чылдар дургузунда уран чүүл болгаш культурага сеткилинден бердинип ажылдаан, 80 артты чоргаар ажып келген хүндүлүг хоочуннуң бүгү кылып келген ажыл-ижи хөйге ёзулуг үлегер дээрзин байырлыг хемчегниң киржикчилери шупту демдеглеп, хоочунга амыр-тайбыңны, быжыг кадыкшылды күзеп тараан.
/ Сорунза МОНГУШ.
Ада ТюлюшТУҢ тырттырган чуруктары.
“Шын” № 39 2026 чылдың октябрь 8
"Шын" солуннуң МАХ-каналынга каттыжыңар: max.ru/channel_shyn