Март 31-де Кызылга сураглыг балет артизи Евгения Салчак аттыг II республика чергелиг өөреникчилер аразынга тыва танцы мөөрейи болуп эрткен. Аңаа Тываның бүгү кожууннарындан 30 коллектив киришкен.
Республиканың барык бүгү булуңнарындан чыглып келген бот-тывынгыр болгаш үлегерлиг уруглар коллективтерин назы-хар аайы-биле үш аңгы бөлүкке чарган: бичии, ортумак болгаш улуг. Фестиваль-мөөрейниң негелдези ёзугаар коллектив бүрүзү хөй кижи киржилгелиг болгаш “биче хевирниң” – ийи танцыны бараалгаткан.
Мөөрейниң организакчызы Тываның А. Чыргал-оол аттыг уран чүүл колледжизиниң башкызы Артыш Сааяның чугаазы-биле, фестивальды эрттирип турар кол-ла сорулгазы тыва национал танцыны кадагалап арттырары, чон аразынга ам-даа нептередири болгаш ниити культураның хөгжүлдезинге үлүг-хуузун киириштирери болуп турар.
Тываның А. Чыргал-оол аттыг уран чүүл колледжизиниң директору Айлаңмаа Каң-оол тыва танцы өске регионнарга деңнээрге, үндезин чоннуң культурлуг амыдыралынга үндезилээн боду аңгы методикалыг дээрзин демдеглээн. Ооң үндезинин РСФСР-ниң база Тыва АССР-ниң алдарлыг артизи, Тыва АССР-ниң күрүне шаңналының эдилекчизи, билдингир хореограф Евгения Мынчыновна Салчак тургускан деп санап турар.
Чораан болза бо чылдың октябрь 4-те 80 харлаар турган сураглыг хореограф Евгения Салчактың адын эдилээн тыва танцының II республика чергелиг фестиваль-мөөрейиниң киржикчилериниң оюн-көргүзүүнүң-даа, кеткен костюмнарының-даа шынары бедик, чараш болганын көрүкчүлер болгаш жюри кежигүннери демдеглээн. Ылаңгыя танцы-самга салым-чаяанныг уругларның чылдан чылче көвүдеп турары, кожуун-суурларда уран чүүл школаларында башкыларның эки ажылы моон көстүп турар деп чыылганнар эскерген.
Мөөрей-фестивальдың түңнелинде I-ги чаданың лауреаттарынга:
8-10 харлыг уруглар аразынга “Сайзанак” үлегерлиг коллектив;
11-13 харлыг уруглар аразынга “Шыңгырааш” ансамбли;
14 хардан өрү назылыг уруглар аразынга “Кашпал” үлегерлиг танцы коллективи төлептиг болган.
II чаданың лауреаттарынга:
8-10 харлыг уруглар аразынга «Угулза» танцы коллективи;
11-13 харлыг уруглар аразынга «Өлчей-Кежик» ыры болгаш танцы ансамбли;
14 хардан өрү назылыг уруглар аразынга «Угулза» танцы коллективи төлептиг болган.
«Эзир-Кара», «Кегээн-Булак» III чаданың лауреаттары болган.
II республика чергелиг эрткен фестиваль-мөөрейниң Гран-при шаңналын Кызылдың Н. Рушева аттыг уругларның уран чүүл школазының “Май” ансамбли чаалап алган.
Чаа-ла ийи дугаар эртип турар тыва танцы мөөрейи хөйнүң сонуургалын оттуруп турар. Ылаңгыя киржикчилеринге болгаш көрүкчүлерге бо чылын чараш байырлал болуп эрткен.
/ Бистиң корр.
ТМГ-ниң чуруктары.
“Шын” №13 2026 чылдың апрель 9
