Шрифт
А А А
Фон
Ц Ц Ц Ц Ц
Изображения
Озвучка выделенного текста
Настройки
Обычная версия
Междубуквенный интервал
Одинарный Полуторный Двойной
Гарнитура
Без засечек С засечками
Встроенные элементы
(видео, карты и т.д.)
Вернуть настройки по умолчанию
Настройки Обычная версия
Шрифт
А А А
Фон
Ц Ц Ц Ц Ц
Изображения
Междубуквенный интервал
Одинарный Полуторный Двойной
Гарнитура
Без засечек С засечками
Встроенные элементы (видео, карты и т.д.)
Вернуть настройки по умолчанию

Автобустар эмчизи Намзырай

21 ноября 2026
4

| ТР-НИҢ ТРАНСПОРТ АДЫРЫНЫҢ 100 ЧЫЛЫНГА |

Бо чылын Тыва Республиканың Транспорт адыры 100 чыл оюн демдеглеп турар. Ук адырда эки үре-түңнелдиг ажылдап чоруур ажылдакчылар бар. Оларның бирээзинге “Туваавтотранс” КХН-ниң аныяк, салым-чаяанныг слесары Намзырай Орланович Ынаалай хамааржыр. Ол 2014 чылда Кызылдың 3 дугаар ортумак өөредилге черин, 2018 чылда Кызылдың транспорт техникумун техник кылдыр дооскаш, шериг албанын эрттиргеш, төрээн Тывазынче чанып келген.

Холу туттунгур, ажылгыр-кежээ, шевер болганындан сургуул чылдарындан тура 2021 чылдың чайынынга чедир “Восток” КХН-ге база “Орук тудуу болгаш транспорт” бүдүрүлге кооперативинге орук ажылчыны болуп ажылдаан. 2022 чылдан тура “Туваавтотранс” КХН-че слесарьлап киргеш, 2024 чылдан амдыгаа чедир транспорт ремонтузунуң салбырында улуг слесарь кылдыр депший берген ажылдап чоруур. 2025 чылда Красноярск хоорайның 7 дугаар пассажирлер аргыштырылгазының бүдүрүлгезинге эртем-билиин бедиткен. 2026 чылдың чайынында “Нейла” КХН-ге машинаның электри дериг-херекселдерин кылыр слесарь-электрик кылдыр өөренип алгаш, ынчан алган билиглерин амгы үеде ажыл-агыйында үре-түңнелдиг ажыглап чоруур.

Намзырай Орлановичиниң күш-ажыл дептеринде чүгле ТР-ниң Орук-транспорт комплекизиниң яамызының адаанда орук-транспорт талазы-биле хүлээникчи организацияларга ажылдап турганы ооң мергежилинге ынаан көргүзүп турар. Ол ам автобустар септеп барык 4 чыл ажылдап турар. “Мен бо мергежилди сонуургаар болгаш, катап-катап өөренип, хүннүң-не немелде материалдарны, номнарны номчуп, бодум хуумда билиим бедидип чоруур мен. Кандыг-даа кижи чаңгыс өөренгеш, бодунуң ажылынга мергежиири берге болганындан хүн бүрүде өөренир апаар. Ынчангаш мен билбес чүүлдеримни айтырып, көрбээн, тутпаан ажылдарымны тудуп, көрүп, бодум холум-биле кылып, шенеп тургаш, ажылдап турар мен”– деп, ол бодунуң чажыдын ажытты. “Баштай ажылдап эгелээн үемде элээн бергелерге таваржып турган бис, колдуунда материал-техниктиг бергелер турган. Машина септээринге эргежок чугула дериг-херекселдер чамдыкта чедишпейн-даа баар, а бир чамдыкта шуут чок-даа болур. Чоорту ол бүгүнү четчелеп алган бис”. Үе эрткен тудум билиин бедидип, дериг-херекселдерин четчелеп алганындан ажылдың түңнели экижип, бедик деңнелче көдүрүлген. “Амгы үеде автобустарывыстың бузулган соңга шилдерин слесарь өөрүм-биле боттарывыс солуптар апардывыс. Слесарь кижи машинаның үрелген кезээн тодарадып, чаа артык кезектер-биле солуп, катап тургузуп, таарыштыр кылып, чогуур деңнелге кылдынган бе дээрзин тодарадып, хынап билир болур ужурлуг”– деп, Намзырай Ынаалай тайылбырлаан. Хүн бүрүде техника сайзырап, чаартылгалар хөйү-биле тыптып, машина септээр технологиялар экижип олурар. Ооң-биле чергелештир ооң ажылдап турары бүдүрүлге чери база сайзырап чоруп олурарын Намзырай улуг чоргаарал-биле демдеглээн.

Ооң удуртукчузу, кол механик Сергей Хомушку ажылгыр-кежээзин, бодунуң ажылын билирин, а харын-даа тергиин эки кылып чоруурун чугаалаан: “Чамдыкта дыштаныр хүннерде азы гаражка дүргени-биле ол-ла дораан кылыр ажылдар-даа тыптып келир. Ындыг үелерде Намзырай Орланович кажан-даа ойталавас, келгеш чогуур ажылдарны ша-даа четпес кылып кааптар кижи. Чеже-даа берге ажыл турган болза, ол черле чажам дивес. Кажан кандыг-ла-бир берге азы чигзинчиг айтырыглар тургустунуп келирге, ол бодунуң билиглери-биле үлежип, үлегер-чижээн көргүзүп, кандыг-даа байдалда бурунгаарлап чоруп олурар боорга, кады ажылдап чоруурумга өөрүүр-дүр мен. Ынчангаш эки слесарь деп үнелеп, хүндүлеп чор мен”.

Ажыл-чорудулга килдизиниң удуртукчузу Елена Корчевая бүдүрүлге черлериниң слесарьларын автобустар эмчилери деп онзалап чугаалаар. Оларның аразындан Намзырай Ынаалайны бүгү ажылдап келген үезинде автобустарны тергиин эки септеп билирин ол демдеглээн.

Даартагы маршрутче автобустарның чогуур байдалга ажылдап үнери дээш, Намзырай Ынаалай аажок сагыш човаар. Кандыг-даа чугула чүүл ону доктаадып шыдавас, автобустарның “кадыкшылын” тодарадып, дүрген дуза чедирери-биле ол далажыптар.

“Туваавтотранс” бүдүрүлге чериниң транспорт-септелге килдизиниң үргүлчү бот-боттарын деткижип, дузалажып, демниг ажылдап чоруурун демдеглевишаан, “демнигде күштүг, тепкииштигде быжыг” деп үлегер домак-биле кады ажылдап чоруур коллективи сорук кирип чоруурун Намзырай Орланович тайылбырлаан.

Намзырай Ынаалайны “Туваавтотранс” КХН-ниң коллективи аныяк, идегелдиг, чүткүлдүг, биче сеткилдиг ажылдакчы деп үнелеп чоруурлар.

Чыжыргана СААЯ.

Саяна Монгуштуң тырттырган чуруктары.

«Шын» №45 2026 чылдың ноябрь 19

"Шын" солуннуң МАХ-каналынга каттыжыңар: max.ru/channel_shyn