Кадык болуңар!
Грипп – халдавырлыг, нептереңгей аарыг. Ооң өөскүдүкчүзү каракка көзүлбес, ону чүгле микроскоп-биле көрүп болур. Грипптээн кижи чөдүрүп, азырып, чугааланып турда, аарыг нептерээр, өөскүдүкчү тыныш органнарынче киргеш, өзүп көвүдээрге, кижи шагзырап эгелээр.
Соок үе-биле кады грипп калбаа-биле нептереп эгелээр. Ынчангаш оон канчаар камгаланырын баш удур көрээлиңер.
Бирээде, бажыңдан үнерде, думчук иштин оксолин мазы-биле азы борный вазелин-биле чаап алыңар.
Ийиде, аарыксай берген болзуңарза, эмненириниң аргаларын бодап эгелээр бис. Эң-не бөдүүн аргалар: удуур мурнунда чылыг сүттү ары чигиринге холааш ижерин азы шопулак ишти ары чигирин кандыг-даа холуксаа чокка чиирин сүмелеп турар. Хайындырган сүт биле «Боржоми» минералдыг сугну холуп ижерге база дузалаар.
ДУМЧУК СУУ КЕДЕРЭЭНДЕ
* горчицалыг сугга (сугнуң температуразы 40-45С) буттарны суп чиңнээр. Ооң соонда ары чигирлиг азы малина вареньелиг изиг шайны ишкеш чыдыптар. Горчица порошогу уруп каан чылыг уктарны кедип ап болур. Бутту чиңнеп чылдырын, горчичник ажыглаарын бүүрээ аарыг, чүрээнде өскерлиишкиннерлиг улуска, сааттыг херээженнерге сүмелевейн турар.
* Инек-карааның хоюдур ууштаан кургаг бүрүзүн 1 улуг шопулакты стакан ишти кончуг изиг сугже каапкаш, экидир шуглааш, 4 шак тургузуптар. Шаарын сыскап каапкаш, чылыг турда, чартык стаканнап пактаар.
Чөдүлдү оожургадыр эмнер аптекаларда эңмежок, ынчалза-даа дыка хөй улус улусчу медицина аргаларын эмнээшкинге ажыглап турар.
* Кара редьканы кескеш, чигирлээш, оон үнген чулукту улуг шопулак иштин бир шактап ижер.
* Чиг дагаа чуургазының сарыг черин чигир-биле холуй булгааш ижерин база сүмелеп турар.
* Ары чигирлиг алоэ (дегдиргенде, туберкулез чөдүлүнден). 300 гр ары чигирин 0,5 стакан сугга каггаш, үүрмектей хээп каан алоэ бүрүзүн каггаш, оожум отка 15-20 минута хайындырар. Сооткаш, холуй булгааш, хүнде үш катап улуг омааш иштин ижер.
* Ийи улуг омааш ак саржагны (сливочное масло), 2 чуурганың сарыг черин, бичии шопулак ишти далганны, 2 бичии омааш ишти ары чигирин эки холуштур булгааш, хүнде каш-даа удаа омааштап ижер.
Чурукту ГигаЧатка чураан.
“Шын” №34 2026 чылдың сентябрь 3
"Шын" солуннуң МАХ-каналынга каттыжыңар: max.ru/channel_shyn