Найысылалдың Вавилин ээтпээ деп адаарывыс микрорайон сөөлгү чылдарда каракка көзүлдүр-ле сайзырап эгелээн – чаа школа ажыглалче кирген, аңаа улай уруглар сады база туттунуп эгелээн, а чуртталга бажыңнары хүнден хүнче көвүдеп-ле орар. Удавас аңаа улуг спорт залы немежир дээрзин ТР-ниң Спорт яамызы дыңнаткан. Ол чүүл ук микрорайоннуң спортчуларынга, спортка ынактарга улуг белек, өөрүшкү болур дээрзи билдингир.
ТР-ниң Спорт яамызының спорт болгаш күш-культура хөгжүлдезиниң килдизиниң консультантызы Елена Монгуштуң дыңнатканы-биле, 2025 чылда «Бизнес-спринт (Мен спортту шилип ап тур мен)» федералдыг төлевилелдиң чорудуу-биле Кызыл хоорайның Вавилин ээтпээ микрорайонга күш-культура-спорт залының тудуунга 42065,7 муң рубль түңнүг субсидия көрдүнген, ооң 41645,0 муңу федералдыг бюджеттен, 420,7 муңу республика бюджединден. Бо хүнде 36358,4 муң рубльди акшаландырган.
Күш-культура-спорт залының тудуун кылыр «Феникс» КХН-биле концессиялыг (күрүне биле хуу компанияларның аразында эштежилге хевири) дугуржулганы 2025 чылдың май 31-де чарган. Төлевилел-смета документилерин ажылдап кылган, 92792 муң рубль түңнү күрүне экспертизазы эки деп көрген. Вавилин ээтпээнде спорт залы тудар чер участогун айтып каан. Аңаа тудуг чорудар чөпшээрелди 2025 чылдың июль 25-те алган. Амгы үеде тудуг материалдары, сэндвич-панельдер, демир конструкциялары-биле хандырар дугуржулгаларны чарган. «Авангард» КХН-биле тудуг контролюнуң дугуржулгазынга керээни чарган база төлээн. Тудуг материалдары октябрь айның эгезинде кээп эгелээр. Ол ышкаш тудуг шөлүн аштап-арыглаар ажылдар, планнаашкын чоруп турар. Ооң-биле чергелештир оңгар казар ажылдар база эгелээн. Тудугну 2026 чылдың декабрьда доозар.
Күш-культура-спорт залы бир каът болур, оран-саваның ниити шөлү 850,19 дөрбелчин метр. Аңаа биче-футбол, хол бөмбүү болгаш баскетбол ойнаар шөлдер, ол ышкаш вестибюль, эр база кыс улустуң хеп уштур, арыгланыр черлери, тренерлерниң болгаш техниктиг ажылдакчыларның өрээлдери турар деп, яамының консультантызы дыңнаткан.
Алдынай СОЯН.
«Шын» №39 2025 чылдың октябрь 9