Тес-Хемниң Ак-Эрик сумузунуң чурттакчызы кандыг-даа назы-харлыг кижи, тускай эртеми чок-даа болза, бодунуң ажыл-херээн ажыдып ап болур деп чүүлдү бадыткаан. Саида Сарыг «Социал керээ» программазы-биле күрүнеден деткимчени алган. Саида Бадыевнаны кым-даа өөретпээн, бодунуң кызымак чоруу-биле дааранып өөренип алган. Амгы үеде чаңгыс чер чурттугларындан чагыгларны хүлээп ап турар, национал костюм даараарынга мергежээн ёзулуг хереглелдиг мастер болган.
Ол социал керээ программазының дугайында таныыры улузундан билип алган. Эрес-кежээ ава 2025 чылдың ноябрь айда чагыгны кииргеш, 350 муң рубль түңнүг күрүне деткимчезин алгаш, эң-не херек дериг-херекселдерни садып алган: бүдүрүлгеге ажыглаар даараныр машина, пөс кыдыын аргыыр оверлок, анаа даараныр машина база угулза, хээлер аргыыр машина.
Саида Бадыевнаның чогум эртеми — маляр, Кызылдың кооперативтиг профессионал-техниктиг училищени дооскан. Баштай эртеминиң аайы-биле ажылдап чорааш, уруглар садынга кижизидикчи башкының дузалакчызы кылдыр ажылдаан. Ооң даараныр тускай эртеми-даа чок турган.
Даараныр сонуургал 30 харлыында оттуп келген. Ол кандыг-даа курстар азы профессионал даараныкчылардан өөренмээн, чүгле кызымак чүткүлү болгаш бодунуң частырыгларындан өөренип алган. Чоорту ол тыва национал хепти чараштыр даарап эгелээн. Ам ооң курлавырында тыва тоннар, хөректээштер, платьелер, ол ышкаш тыва бөрттер болгаш сумкалар бар.
Кажан бүдүн класска, ол дээрге 10-20 кижиге, национал костюмнар даараар чагыг кээрге, чааскаан күш четпестей бээр апарган. Ынчан Саида Бадыевнага өөнүң ээзи биле оолдары дузалажып кириптерлер. Улуг оглу Кызылда ажылдап, чурттап турар. Ада-иезинге келгенде, база даараныр машина артынга олуруптар. Бичии оглу Ак-Эрик школазында 11 класс. Ийи оглу национал идик-хеп даараарын авазындан өөренип алганнар.
«Бүдүн класска тыва хеп даараар чагыг кээрге, чааскаан күш четпестей бээр мен. Ынчангаш өөм ээзи биле оолдарым дузалажырлар. Шупту олурупкаш, дааранып кириптер бис» — деп, Саида Бадыевна чугаалаар.
Кызымаккай ава бажыңының хериминиң иштинге аңгы мастерская кылып алыр сорулгалыг. Ам бодунда ол бажыңында чагыгларны хүлээп, дааранып олурар. Ажыл-херээн улгаттырып, даараан ажылдарын садыгларга садар күзелдиг.
Социал керээ — деткимче хемчеглериниң эң-не ажыктыг болгаш дузалыг программазы. Ынчангаш ол чаңгыс чер чурттугларын, ылаңгыя аныяктарны, чүден-даа кортпайн, ол арганы ажыглаарын, тус черге бодунуң ажыл-херээн ажыдып алырын кыйгырып турар.
«Дыка ажыктыг программа-дыр. Бодумнуң дуржулгамда көрдүм: улуг күзелдиг болгаш ажылыңга ынак болзуңза, күрүне бирги базымны кылыр деткимчени бээр» — деп, ус-шевер ие чугаалаар.
Бистиң корр.
Чуруктарны «Тывамедиабөлүктен» алган.
“Шын” №17 2026 чылдың май 7
"Шын" солуннуң МАХ-каналынга каттыжыңар max.ru/join/egenQ...