Март 19-тан апрель 23-ке чедир Кызылга уругларның уран чүүл школаларының сургуулдарының аразынга “Уран чүүлдүң челээжи” деп фестиваль болуп эрткен. Ону Россияның чоннарының чаңгыс деминиң чылынга база Тургузукчу күш-ажылдың болгаш өг-бүлениң ыдыктарының чылынга тураскаадып эрттирген.
XXIX регионнар аразының ажык фестиваль-мөөрейиниң угланыышкыннары ол-ла хевээр өскерилге чок арткан:
– «Хөгжүм уран чүүлү»;
– «Чурулга уран чүүлү»;
– «Хореография талазы-биле чогаадылга»;
– «Театр уран чүүлү».
Угланыышкын аайы-биле Кызылдың аңгы-аңгы культура албан черлеринге – А.Б. Чыргал-оол аттыг Кызылдың уран чүүл колледжизинге, Республиканың Р. Кенденбиль аттыг уругларның уран чүүл школазынга, Тываның В. Халилов аттыг күрүне филармониязынга, Тыва үндезин культура төвүнге уруглар мөөрейлешкен. Киржикчи бүрүзү ооң оюн-көргүзүүн сонуургап келген жюри кежигүннеринден аңгыда, өске-даа көрүкчүлерге чараш байырлалды сөңнеп турган. Оларның аразындан эң-не дээре дирткен тиилекчилер тус-тузунда шаңналдарга төлептиг болганнар.
Тываның бүгү булуңнарындан чыглып келген уран чүүлге сундулуг бо өөреникчилер аразындан эң-не шыырактары шилиттингеш, төрээн суурун, кожуунун, хоорайын, өөренип турары уран чүүл школазын болгаш башкыларын өөртүп алдаржытканнар.
Фестиваль хүннеринде мөөрейден аңгыда, уран чүүлге салым-чаяанныг өзүп олурар чаштарга янзы-бүрү солун хемчеглер, Тываның уран чүүлүнүң алдарлыг кижилери, сураглыг хөгжүмчүлери-биле ужуражылгалар, мастер-класстар база эрткилээн.
Каш хонук салым-чаяанныг чаштар, шынап-ла, уран чүүлдүң челээжин тургузуп, хөй кижини өөрткен. Оларның аразындан келир үеде ады диңмиреп үнүп кээр профессионал деңнели бедик артистер хөй болуп, Тывазын алдаржыда бээр дээрзинге бүзүрел күштүг.
Бистиң корр.
Чурукту Ак-Довурактың уругларның уран чүүл школазының ВКонтактеде арнындан алган.
“Шын” №16 2026 чылдың апрель 30
"Шын" солуннуң МАХ-каналынга каттыжыңар max.ru/join/egenQ...