«Тываның маадырлары» кадрлар программазының Тываның күрүне университединге «Күрүне болгаш муниципалдыг эргелел» программазынга тураскааткан регионалдыг үшкү кезээ доозулган. Киржикчилер өөредилге шылгалдаларын чедиишкинниг дужаап, стажировка эгезинде сүмелерни ап, өөредилгезиниң сөөлгү чадазының түңнелдери-биле танышкан.
Үшкү өөредилге программазы эң-не шыңгыы чадаларының бирээзи болган. Ооң практиктиг кезээнде киржикчилерге чижек кылдыр Чөөн-Хемчик кожуун чагыргазының ажыл-чорудулгазын көргүзүп, тус чер чагырга органнарының ажылы-биле таныштырып, кожуун инициативаларының күүселдезин болгаш көдээ чурттакчыларның культурлуг амыдыралын шиңгээдип көөр арганы берген.
Хоочуннар Тываның регион башкарылга төвүнге база Коммуникация мастерскаязынга чедип, медиа-аналитика, социал четкилерге ажылдаарының, сан-чурагайлыг хүрээлелге күрүне албан-хаакчыларның алдынарының онзагайының талазы-биле, ол ышкаш чугааны чорударының болгаш амгы үениң харылзаа практикаларының чугула айтырыгларын өөредилге үезинде сайгарып көргеннер.
Өөредилге программазының сөөлгү чадазында курс материалын шиңгээдип алганын хынаарының чугула кезээ болур түңнел шылгалданы эрткен. Тыва Республиканың Дээди Хуралының депутады, ТывКУ-нуң бухгалтерия, анализ болгаш аудит кафедразының доцентизи Буян Донгак база экономика факультединиң деканы болгаш программаның директору Чодураа Манчык-Сат өөредилге программазының чамдык болгаш кол түңнелдери-биле таныштырган.
Киржикчилерниң белеткели шыырак болгаш, улаштыр өөрениринге практиктиг ажыл-чорудулгага беленин шылгалдалар бадыткаан. Удур-дедир харылзааның түңнел сессиязында чедимчелиг үре-түңнелдерни айтып, өзериниң угланыышкынын демдеглеп, программа боттандырылгазының дараазында базымнарын тодараткан.
Оон аңгыда кадрлар программазының киржикчилери шиңгээдип алган билиглерин стажировкалаарынга база күрүне болгаш муниципалдыг удуртулга ажылдарынга ажыглаарының тодаргай сүмелерин алганнар.
Июнь 30-де төнчү ажылдар камгалаашкыны-биле «Тываның маадырлары» кадрлар программазының түңнел чадазы доостур.