Владислав Ховалыг Москвага ажыл-агыйжы сургакчылаашкын үезинде Россия — Моол кызыгаарында «Хандагайты» автомобиль пунктузунуң эде чаартылгазын доозарының дугайында «Роскызыгаар тудуг» федералдыг күрүнениң казна албан чериниң удуртулгазы-биле чугаалашкан. Тудуг ажылдарын 2026 чылдың төнчүзүнге чедир доостур ужурлуг деп ужуражылга үезинде дыңнаткан. Бо хүнде тудуг чери объектини электри четкизинге кожар дугайында чугааны энергетиктер-биле чорудуп турар.
«Хандагайты» автомобиль эрттирилге пунктузунуң чаартылгазы 2022 чылда эгелээн болгаш ол ийи чададан тургустунганын сагындыраал. Бир дугаарында чүък транспортун эрттирер автоматчыткан ийи комплексти тудуп дооскан. Ам ийиги чадада пассажирлерже угланган участокту эде чаартыр. Аңаа чаартылга ажылдары доосту бээрге, пункт хөй талалыг ажылдап, үшкү чурттарның чүък сөөртүлгезинге база хамаатыларынга ажык апаар.
Ынчан «Хандагайты» эрттирилге пунктузу таварты ийи катап хөй автомашиналарны — хүнде-ле 200 чедир машиналар эртип, 560 кижи чедир пассажирлер аргыштырылгазы бүдүн чартык катап көвүдээр.
Төлевилел Тываның болгаш бүгү Сибирь регионунуң хөгжүлдезинге стратегтиг ужур-дузалыг дээрзин Владислав Ховалыг демдеглээн. Келир үеде тускай экономиктиг зона аңаа туттунар. Ынчангаш «Хандагайты» пунктузу транспорттуң кол белдири апарып, Моол база Кыдат-биле садыг-экономиктиг харылзааларны элээн калбартып, бизнести хөгжүдеринге чаа аргаларны тургузар.
«Хандагайты – Боршоо» эрттирилге пунктузунуң чаартылгазы - ниити транспорт коридорун тургузар дээн орус-моол-кыдат улуг төлевилелдиң бир кезээ болуп турар. Моол талазы бодунуң ажылын 2024 чылда-ла дооскан. Каайлы-кызыгаар инфраструктуразын чаартырындан аңгыда, а Урумчи (Кыдат) – Ховд (Моол) – Улангом (Моол) – Хандагайты (Россия) автоорукту база туткан.