Май 9-та 1941-1945 чылдарда Ада-чурттуң Улуг дайынының маадырларынга болгаш хоочуннарынга тураскааткан «Өлүм чок полк» деп бүгү-российжи патриотчу акцияга Тыва Республика база каттыжар.
Акция республиканың муң-муң чурттакчыларын каттыштырып, өг-бүле бүрүзүнге бодунуң маадырының төөгүзүн кадагалап, дамчыдар арганы бээр. «Өлүм чок полк» чүгле чыскаал эвес, а амгы үеде эрткен чылдарынга чоннуң сактыышкынының бир кезээ-дир.
Республиканың төвү Кызыл хоорайның Ленин кудумчузунга чыскаал 10 шак 15 минута турда эгелээр. Республиканың чурттакчылары болгаш аалчылары боттарының чоок кижилериниң — Тиилелгеге үлүг-хуузун киирген бүгү улустуң, дайын киржикчилериниң, тыл ишчилериниң база ол ышкаш тускай шериг операциязының болгаш тус чер дайыннарының маадырларының чуруктарын тудуп алгаш, чаңгыс колоннага марштап эртер.
Акцияның киржикчилери 9 шакта Кызылдың Ленин биле Комсомольская кудумчуларының белдиринге чыглыр. Организакчылар айыыл чок чорукту хандырар сорулга-биле демир-дес хынап эрттирер пунктуларны тургузар, ынчангаш эртежик чыглып кээрин сүмелеп турар. Ол ышкаш маадырларыңарның чуруктарын ыяшка эвес, а чук тудаларга быжыглап алырын сүмелээн.
Акцияга боду барбайн, интернет таварыштыр база киржип болур. Акцияның албан езузунуң интернет-шөлүнге хоочуннуң чуруун, ооң маадырлыг чоруунуң дугайында төөгүзүн салып алыр. Билдириишкиннерни май 6-га чедир төлевилелдиң 2026.polkrf.ru/ албан езузунуң сайтызынче киирер.
Оон аңгыда социал четкилерде болгаш мессенджерлерде темалыг акциялар эртип турар, аңаа чурттакчы чон боттарының маадырларының эрес-дидим чоруунуң дугайында таныштырып, байырлал открыткаларынга хоочуннарның чуруктарын аватарлар кылдыр солуп ап болур. «Өлүм чок полктуң» албан езузунуң сайтызынга темалыг открытканы чуруттуруп ап база болур.