Апрель 18-те Бүгү-делегейниң өнчү-салгал хүнү деп билдингир апарган Делегейниң тураскаалдар болгаш төөгүлүг черлер камгалалының делегей чергелиг хүнүн демдеглеп турар. 1982 чылда Тураскаалдар болгаш төөгүлүг черлер талазы-биле делегей чөвүлелиниң Ассамблеязы бо байырлалды тургузарын саналдаан, а 1983 чылда ЮНЕСКО ону албан езузу-биле бадылаан. Төөгүлүг өнчү-салгал дээрге хайгаарал негеттинген ниити курлавыр болгаш сактыышкын деп чүүлче кичээнгейни хаара тудар сорулгалыг кол ажыл болур.
Бо хүнде янзы-бүрү гуманитарлыг болгаш техниктиг мергежилдерниң специалистери байыр чедириишкинин ап турар. Оларның санынче реставраторлар болгаш архитекторлар, археологтар болгаш төөгүчүлер, музей болгаш заповедник ажылдакчылары, экскурсоводтар кирип турар.
Тывада республиканың ажыл-чорудулганың чамдык хевирлеринге чөпшээрел бээр албанның Культура өнчү-салгал объектилерин камгалаар эргелели чылдың-на Тураскаалдар болгаш төөгүлүг черлерни камгалаар бүгү делегей хүнүнге тураскаадып, аңгы-аңгы хемчеглерни организастап эрттирип турар. Ол дээрге тураскаалдарже экскурсиялар, уругларга квестер, «100 эң-не солун тураскаалдар» деп эссе-мөөрей, конференциялар, субботниктер болгаш өске-даа хемчеглер-дир.
Бо чылын Культурлуг өнчү-салгал объектилерин камгалаар эргелел байырлалга тураскааткан «Өнчү-хөреңги бистиң холувуста» деп акцияга киришкен. Апрель 17-де культурлуг өнчү болур «Бодхисаттва буддийжи ыдык субурган» объект чоогун аштап-арыглаан. Кызылдың 5 биле 17 дугаар школаларының өөреникчилери база Тыва Республиканың «Тываның энерелдиг чүректери» аныяктарның хөй-ниити шимчээшкининиң идепкейжилери субботникке дузалашкан.
Специалистерниң санап турары болза, Тывада төөгү болгаш культура тураскаалдарының көвей кезии Төп Азияның улуг көшкүн цивилизацияларының археологтуг өнчү-салгалынга хамааржыр. Оларның аразындан чүгле эвээш кезии — 1,5 муң хирези шинчилеттинген болгаш күрүне камгалалында.