* * *
Апрель айда харлыг дүвү
Хадымырлап бораңнай-дыр.
Аккыр харлар соксаал чокка
Кара черже бадып турлар.
Төнчү чокка дүшкен хардан
Хөрек-чүрек дидирей-дир.
Бууккан чүрек ажыңайнып,
Муңгак күстү сагындырды.
Дүргектелип, хатка эстээн,
Дүндүүштелген калчаа харлар
Черге дүшкеш, ол-ла дораан,
Чеже боорул, эстип турлар.
Канчаар-даа кыш шугулдаза,
Кайгамчык чай чедип келир.
1997 ч.
Чотпуң-оол ЧОЧАГАР
* * *
Ужу-кыдыы көзүлбес көк далай-дыр сен.
А мен ында эшкиижи чок хемежи мен.
Уг-шиим безин чидирипкен, аскан-тенээн,
Ааттынып, чайгаттынып, салдап чор мен.
Эриктериң бараан четпес ыракта-дыр.
Эгээртинмес делгемнериң төнчү чок-тур.
Сүржүп келген чалгыглардан чечек манап,
Сүзүүм сөглеп шыдап чадап, падын бараан.
Оо, далай! Оранымның байы-дыр сен.
Орлан, түрлүүң мени аажок магададыр.
Чаңгыс чүгле чакпазы чок балык ышкаш,
Чассып таалап, эргеленип шыдавас мен.
Эшкиижи чок ында салдаан хемежиниң
Эрээ-хинчээн эскерериң кандыг болду...
1995 ч.
Сайлыкмаа КОМБУ.
* * *
Ылчыргай өл малгаш-балар орук черлеп,
Ыргак-дагыр истер шыйыын арттырбышаан,
Кыжырткайндыр дагжап эрткен бузук терге
Кызыл-хүннүң дүдүскээнче ырап бар чор.
Боттарын чүм билишпээнниң хараазындан
Бодал, сагыжы дүгжүп, бүдүп чогувастаан,
Ала-чайгаар үе чылзып чурттап чоруур
Ашак-кадай салымынга дөмейледим...
Билчилгеже базым кылып оралдашпаан
Бистер база шак ол терге истери дег,
Кожа-даа бол, уткужуп аар аргавыс чок,
Хову-шөлде тыпчып чадап чоруур дег бис...
Кызыл-хүннээр кежээвисче киргелекте,
Кыйгы салып, уткужуп ап көрээл сарыым.
1990 ч.
Октябрь ТУҢ-ООЛ.
* * *
Карак дешпе караңгы дүн.
Кайгамчыктыг аяс көк дээр.
Кайызын-даа кандыг дээрил –
Катай-хаара меңээ эргим.
Дүштен-дүлден ыравастаан
Чаптып баткан суук чажың,
Чайнап чоруур дозур карааң
Дүмбей дүннү дөзеп ап-тыр.
Эъдим-ханым чымырадыр
Эглип келгеш, хүлүмзүрүүң
Шаңнай бээр сен – арыг ак-көк
Шаары дээр дег чорбадыва.
Дүмбей дүнче, кылаң дээрже
Дүлнү берейн, чиде берейн.
Василий ХОМУШКУ.
Чурукту ГигаЧатка чуруткан.
“Шын” №13 2026 чылдың апрель 9