Эрткен субботада Каа-Хемде чаа туттунган «Тиилелге» спорт өргээзинге чараш танцы-сам фестивалын көргеш, өөрүшкүмнү үлежикседим.
Субботада, апрель 25-те, Делегейниң танцы хүнүнге тураскааткан дыка хөй кижи киржилгелиг танцы-сам фестивалын көөр аас-кежиктиг болдум. «Аржаана дугайында тоолчургу чугаа» деп чараш хемчегже билетти муң ажыг акша-биле уругларым садып берген. Бичии-даа хараадавадым.
«Саян» ансамбли, «Эдегей», «Урянхай» мода театрлары дээш өске-даа аныяк ыраажылар, самчы- лар – ниитизи-биле муң ажыг кижи аңаа киришкен. Бүдүн зал янзы-бүрү өңнер-биле чырыткыланып, бир-ле даштыкы чуртта Олимпиада ажыдыышкынын көрүп, тоолзуг оранда келген ышкаш болдум. Самчыларның танцы-самын магадап көргеш, чоргааралым кыптыгып турду. Ыры-хөгжүмнүң үнү ам-даа кулаамда чаңгыланып тур. Дыка-ла кайгамчык улуг байырлал, танцы-сам оранынга четтим.
Тываның улустуң артизи Сайнхо Намчылактың «Аржаана» деп хөгжүмнүг тоолунга үндезилеп тургускан дээрзин аңаа чарлады. Ийи кезектиг улуг оюн-көргүзүг- нүң режиссёру Алёна Дөңгүр-оол.
«Тиилелге» спорт өргээзи мындыг улуг хемчеглер эрттиреринге дыка эптиг-дир, ёзулуг үезинде туттунган спортчу объекти-дир деп көрүп, магадап олурдум.
/ Татьяна СОЛАГАЙ.
Кызыл хоорай.
“Шын” №16 2026 чылдың апрель 30
"Шын" солуннуң МАХ-каналынга каттыжыңар max.ru/join/egenQ...