| Сөөлгү беш чылда... |
Тываның бүгү кожуун, суурларында спорт чылдан чылче хөгжүп турар дээрзин эрткен беш чылдың түңнелдеринден көскү барымдааларны эскерип болур.
Бир эвес 2021 чылдың январь 1-ниң көргүзүглери-биле күш-культура болгаш спортче хаара туттунган республиканың чурттакчыларының саны 163 483 (53 хуу) турган болза, 2026 чылдың январь 1-ниң көргүзүглери-биле 187 365 (60,5 хуу) четкен.
Доктаамал күш-культура болгаш спортче хаара туттунган хамаатыларның чылдан чылче көвүдеп турары (хуу)
Оон аңгыда 2021-ден 2025 чылга чедир 61 спорт объектилери немешкен:
39 “Эзирлер уязы”;
9 ангар хевирниң модульдуг залы;
3 күш-культура залы;
1 стадион;
8 ГТО шөлү;
1 спортчу-культура төвү.
Бир эвес 2021 чылда 510 спорт объектизи ажылдап турган болза, 2026 чылда 571 четкен.
2025 чылда республика бюджединден болгаш инвесторларның киириштирген акшаландырыышкыны-биле дараазында спортка хамаарышкан чаа тудуглар немешкен:
- Каа-Хем суурда “Победа” спорт-культура төвү;
- 2 күш-культура болгаш спорт залы (Кызыл хоорайда болгаш Эрзин суурда);
- 2 спорт шөлү (Кызыл, Ак-Довурак хоорайларда);
- Кызылдың Вавилин ээтпээнде күш-культура болгаш спорт залының тудуу эгелей берген;
- Кызылдың “Спутник” микрорайонунда модульдуг эштир бассейн тудуун эгелей берген;
- 2 ГТО шөлү (Тес-Хемниң Берт-Даг суурунда, Барыын-Хемчиктиң Кызыл-Мажалыкта);
- 11 спорт школазынга капиталдыг септелгени чоруткан.
2026 чылда уламчылаар тудуглар:
- 5 ангар хевирниң модульдуг залы (Чөөн-Хемчиктиң Шемиге, Каа-Хемниң Кундустугга, Бии-Хемниң Өөкке, Бай-Тайганың Хемчикке, Барыын-Хемчиктиң Дөң-Терезинге);
- 8 биче хевирниң спорт залы «Эзирлер уязы» (Бай-Тайганың Кызыл-Дагга, Барыын-Хемчиктиң Аяңгатыга, Чөөн-Хемчиктиң Чыраа-Бажынга, Каа-Хемниң Сарыг-Сепке, Сүт-Хөлдүң Кызыл-Тайгага, Тес-Хемниң Самагалдайга, Чеди-Хөлдүң Ак-Талга, Эрзинниң Бай-Дагга);
- Шагаан-Арыгда спорт залының тудуун дооскаш, ажыглалче киирер;
- 2 спорт залы (Кызылдың Вавилин ээтпээнге, Кызылдың “Спутник” микрорайонунга);
- 4 “угаанныг” спорт шөлү, 5 ГТО шөлү, 10 спорт шөлү;
- Кызылдың Каа-Хем микрорайонунга модульдуг спорт залының тудуун уламчылаар.
Спорт болгаш күш-культураны чер-черлерге хөгжүдеринге “Көдээ черниң тренери” программа болгаш спорт школаларын бүрүнү-биле септеп, чаартып турары улуг деткимчени көргүзүп турар.
Бо-ла бүгү спорт талазы-биле хөгжүлдени чедип алыр дээш, каш чылдар дургузунда кылып келген ажыл халас барбаан дээрзин Тываның спортчуларының дараазында чедиишкиннери бадыткап турар:
2021-2025 чылдарда ниитизи-биле Тываның спортчулары 2536 медальды чаалап алган: 2021 – 402 медаль, 2022 – 494 медаль, 2023 – 492 медаль, 2024 – 509 медаль, 2025 – 639 медаль.
Сорунза МОНГУШ.
ТР-ниң Спорт яамызының медээзи-биле белеткээн.
“Шын” №18 2026 чылдың май 14
"Шын" солуннуң МАХ-каналынга каттыжыңар max.ru/join/egenQ...