Тываның Чазааның Аппарат хуралынга эрткен неделяда болган аңгы-аңгы болуушкуннарның оперативтиг байдалын делгереңгейи-биле сайгарган. Тодаргайлаарга, "Орлёнок" уруглар лагеринге болган болуушкуннуң байдалын сайгарып көрген. Июнь 21-де эзирик кижи лагерьниң корпустарының бирээзинче киргеш, уругларже халдаан. Иштики херектер сайыды Юрий Завьялов истелге бөлүүнүң ажылының түңнелдери-биле болуушкуннуң байдалының дугайында илеткээн.
Ол болуушкуннуң истелгезиниң түңнелинде Республиканың Баштыңы Владислав Ховалыг бодунуң оралакчыларынга болгаш чогуур албан черлеринге даалгаларны берген.
Республика Баштыңы корум-чурум камгалаар органнардан болуушкуннуң кем-херек үүлгедикчизиниң ажыл-херээнге амгы хоойлужудулгага шыңгыы дүүштүр, ол ышкаш шупту харыысалгалыг албан-дужаалдыг кижилерден, ылаңгыя лагерьниң удуртулгазындан уругларның айыыл чок чоруун хандырып шыдаваан, юридиктиг талазы-биле долу үнелелди бээрин негеп турган.
Республиканың удуртукчузу корум-чурум камгалаар органнардан кем-херек үүлгедикчизиниң кылган херээнге хамаарыштыр, ол ышкаш уругларның айыыл чок чоруун хандырып шыдаваан шупту харыысалгалыг албан-дужаалдыг кижилерден, ылаңгыя лагерьниң удуртулгазындан, хоойлужудулгага дүүштүр шыңгыы түңнелди үндүрерин негээн.
ИХЯ-ның регионда удуртулгазынга республика Баштыңы уругларның дыштаныр черлериниң чоогунда девискээрлерни доктаамал хайгаараар графикти тургузарын дааскан.
Бүгү республиканың школаларынга июнь 26-27 хүннеринде болур доозукчуларның байырлалын организастаар болгаш эрттирер харыысалгалыг кижилерге уругларның айыыл чок чоруун хандырарын Владислав Ховалыг база дааскан.
Муниципалдыг тургузуг бүрүзүнде хемчегни организастаар болгаш эрттирер бүгү-ле айтырыгларны харыылаар кылдыр Чазактың төлээлерин быжыглаан.
/ Медээни болгаш чурукту Тыва Чазактың парлалга албанындан алган.
“Шын” №24 2026 чылдың июнь 25
"Шын" солуннуң МАХ-каналынга каттыжыңар: max.ru/join/egenQ...