Тывада “Азия төвүнде чай” деп салым-чаяанныг уругларга регионнар аразының чайгы школазы ажыттынган. Бо чылын шак ол школага 70 ажыг уруглар киржир. Олар шупту российжи, регионалдыг мөөрейлерниң лауреаттары болуп турар.
Школада Тываның салым-чаяанныг уругларындан аңгыда, Хакасияның болгаш Новосибирск хоорайның уругларның уран чүүл школаларындан сургуулдары четкилеп келген.
Чайгы школаның байырлыг ажыдыышкынында ТР-ниң культура сайыды Виктор Чигжит байыр чедиргеш, “Мурнуу Сибирьниң салым-чаяанныг уруглары-биле ужуражыры меңээ дыка улуг өөрүшкү болуп турар. Тывада чылдың-на эртип турар “Азия төвүнде чай” деп чайгы школа уругларга дуржулга солчуп, бот-боттарын танып, билчип алырынга, чаа-чаа чогаадыкчы чедиишкиннерже базым кылырынга дыка эки арганы берип турар” – деп, ол чугаалаан.
ТР-ниң Культура яамызының тургусканы бо школа ам 11 чыл ажыг уламчылап турарын сагындырып каары чугула. Ооң кол-ла сорулга- зы – салым-чаяанныг уругларга моон-даа соңгаар бодунуң чогаадыкчы арга-шинээн оттуруп, талантызын ажыдып сайзырадырынга эки байдалдарны тургузары.
Чайгы школаның киржикчилеринге Абакан, Новосибирск хоорайлардан чалаттырган башкылар көргүзүг кичээлдерин эрттирер. Неделя дургузунда кижи бүрүзү солун ужуражылгалардан чаа-чаа билиглерни, уттундурбас болуушкуннарны сагыштарынга арттырар дээрзи билдингир.
Июнь 5-те школаның ажылының түңнели болур гала-концерт В. Халилов аттыг Тываның күрүне филармониязынга болур.
Бистиң корр.
Медээ болгаш чуруктарны ТР-ниң Культура яамызындан алган
“Шын” №21 2026 чылдың июнь 4
"Шын" солуннуң МАХ-каналынга каттыжыңар: max.ru/join/egenQ...