«Таарымчалыг хоорай хүрээлеңин хевирлээри» программаже кирип турар Кызылдың девискээрлерин чаагайжыдып турар. Кызылдың эрги “Детский мир” мурнунда чаартылга ажылдары колдуу доозулганын хоорайның чагыргазы дыңнаткан.
Кызылдың “Детский мир” автобус доктаамының девискээрин чырыдар сөөлгү ажылдар арткан. Садыг төвүнүң мурнунга тургузар үш чагының сайгылгааннары караңгы үеде ол чоок-кавыны чырыдар. Амгы үеде ында кабельдерниң чүгле уштары черде көстүп чыдар-даа болза, бо хүннерде ажыл доостур деп хүлээникчилер аазаан.
"Маңаа караңгы үеде девискээрни, уруглар ойнаар шөлчүгешти чырыдар чагыларны, бичии уругларга чайганыыштарны база азып каан сандайларны тургузар"— деп, «Элита» ниитилелиниң проравы Александр Богданов дыңнаткан.
Чайганыыштарның турар чериниң чанында сандайларны салыпкан, аңаа клумбаларга чечектерни тарыыр. Чадаг кижилер оруу биле уруглар ойнаар шөлдүң аразын база чечектер-биле каастаар. Черге тууйбужугаштарны чадар кол ажыл доозулган. Найысылалдың чурттакчылары девискээрниң чаартылгазынга өөрүп, сагыш-сеткили-биле үлешкен.
Кызылдың чурттакчызы Мария Күжүгет: "Бис өске чурттардан, Россияның аңгы-аңгы регионнарындан аалчыларны манап турар бис, ынчангаш Кызыл чараш болган тудум, аас-кежиктиг болур бис. Ажылды кылып турар кижи бүрүзүнге: тудугжуларывыска болгаш удуртукчуларывыска четтирдивис".
Ам-даа кылыр ажыл хөй. «Таарымчалыг хоорай хүрээлеңин тургузары» программа езугаар бо чылын хоорайның кирер черинде стеланы чаарткан. Өг-бүле парыгынга эртем-өөредиглиг шөлдү тургузар. Келир чылын база ийи улуг төлевилелди боттандырарын планнаан.
"Титов кудумчузунуң уланчызы база бо девискээрниң чаагайжыдылгазынга хамааржыр. Титов кудумчузунуң Кочетов кудумчузу-биле белдиринден Красноармейская кудумчузунга чедир кезээ. Ында чаагайжыттынмаан девискээр бар.Хоорайның төп кезээнде турар чер, ынчалза-даа хөй чылдар дургузунда аңаа агаарлап кылаштаар таарымчалыг байдал кылдынмайн турганын чурттакчылар шупту билир. Чурттакчыларывыстың идепкейлиг киришкен ниити бадылаашкынының түңнелинде шилип алдынган ийиги төлевилел дээрге Дээди Судтуң чанында девискээрниң чаагайжыдылгазы" — деп, Кызылдың мэриниң оралакчызы Вячеслав Судер-оол чугаалаан.
Объектилерни чаартырынга үнүн берген чурттакчыларның боттарының идепкейлиг хамааты туружунуң ачызында хоорайда чаагайжыдылга ажылдары боттанып турар. Эрткен чылын программаже Кызылдың үш шөлү кирген турган. Төлевилел ёзугаар хем эриинде тускай шериг операциязының маадырларынга тураскаалды тургускан, солагай талакы эрикте дачалар ниитилелиниң 5 дугаар автобус доктаамының девискээрин болгаш Дөгээ даанче үнер бир дугаар бедигээшти чаагайжыткан.
Бистиң корр.
Буян ООРЖАКТЫҢ тырттырган чуруу..
“Шын” №31 2026 чылдың август 13
"Шын" солуннуң МАХ-каналынга каттыжыңар: max.ru/channel_shyn