Бии-Хем кожууннуң Аржаан школазының 7-ги классчылары бо чылдың чайгы дыштанылгазында Крымның «Стремительный» деп спортчу лагеринге Бүгү-россия чергелиг «Президентиниң маргылдаалары» программага чедиишкинниг киришкеннер. Ол программаның негелдези ёзугаар чаңгыс класстың өөреникчилеринден тургустунган класс-командазы баштай школазынга чайгы спортка идепкейлиг киржип, тиилелгелерни чедип алыр. Ийи дугаарында кожуун школаларының аразынга тергиидээн болур. Үш дугаарында зона маргылдааларынга тиилээр. Дөрт дугаарында республиканың бүгү көдээ школаларының тиилекчизи болуп, шылгаттынар.
Аржаан школазының 6-гы классчылары эрткен өөредилге чылында ол бүгү шылгалдаларны бүзүрелдии-биле эрткеш, бо чылдың чайгы дыштанылгазының үезинде «Президентиниң маргылдаалары» Бүгү-россия чергелиг маргылдааларның программазын ёзугаар шыңгыы белеткелди чорудуп эгелээн. Маргылдааларның дүрүмүнде бар бүгү документилерни школаның директору, класстың удуртукчу башкызы база күш-культура башкызы демниг ажылдап кылганнар. Дүрүм ёзугаар маргылдааларның киржикчизи класс-командазынга 3 оол, 3 уруг, а удуртуп-башкарары-биле класстың удуртукчу башкызы биле школаның күш-культура башкызы болур ужурлуг.
Бо өөредилге чылында 7 классче шилчээн команда сентябрь төнчүзүнде Крымче аъттаныпкан. Аңаа бүгү Россиядан шилиттинген көдээ школаларның класс-командалары-биле шыңгыы демиселдиң түңнелинде бии-хемчилер 41 дугаар черге төлептиг болуп, эки белеткелдиин көргүскеннер. Тываны төлээлээн команданы судья коллегиязы бедии-биле үнелеп, удуртукчуларынга байырны чедирип, холун тудуп турганнар.
Бүгү-россияның шылгараңгай 66 класс-командазындан 41 дугаар болганы – улуг чедиишкин-дир.
«Президентиниң маргылдаалары» дээрге РФ-тиң Президентизи В.В. Путинниң 2010 чылдың июль 30-де үндүрген 941 дугаар Бүгү-россияның школачыларының спортчу маргылдааларын (оюннарын) эрттирериниң дугайында доктаалын боттандырары болур.
Бүгү Россияның көдээ школаларының командаларының аразынга Тываны төлээлеп киришкеш, чедиишкинниг болуп, Тывазының адын сыкпаан команданың кежигүннери бо-дур: Идегел Куулар, Алдын-Даш Чочак, Санчай Донгак, Ксения Доржукай, Онзагай Доржукай, Виктория Пичи-оол база клазының башкызы Виктория Каң-ооловна Такы, күш-культура башкызы, тренери Тимур Владимирович Такы.
Ким-оол САРЫГ-ДОНГАК, ТР-ниң алдарлыг башкызы, Тываның Чогаалчылар эвилелиниң кежигүнү.
Чурукту авторнуң хууда архивинден алган.
“Шын” №43 2026 чылдың ноябрь 5
"Шын" солуннуң МАХ-каналынга каттыжыңар: max.ru/channel_shyn
