Н. Гастелло аттыг культураның болгаш дыштанылганың национал парыгында шупту дыштаныкчыларга Wi-Fi четкизин тургускан. Ооң ачызында паркта эртип турар хемчеглер үезинде болгаш анаа агаарлап-даа чорааш, шупту улус харылзаага артар аргалыг апарган.
Амгы үеде онлайн харылзаа, интернет чокка амыдыраары берге апаар дээрзи кымга-даа билдингир. Ынчангаш чурттакчы чонга эптиг байдалды тургузары-биле Гастелло аттыг культура болгаш дыштанылга парыгының девискээринде айыыл чок болгаш дүрген харылзааны хандырар халас Wi-Fi четкизин тургускан. Ол Кызылдың чурттакчыларынга болгаш аалчыларынга кезээде харылзаага артарын магадылап турар.
Н. Гастелло аттыг национал парктың директору Михаил Табаев ажылын таныштырган: «Ооң мурнунда интернет, ылаңгыя байырлалдар үезинде, кызыгаарлыг турган, ам Wi-Fi-ның ачызында интернетче кирери болгаш ажыглаары чиигээн. Ам парк аныяктарның болгаш шупту улустуң ынак болгаш таарымчалыг чери апаар. Вай-файның ачызында хоорайның чурттакчылары болгаш аалчылары кызыгаарлаашкын чокка интернетче кирер аргалыг апарган”.
Бо эгелээшкин ТР-ниң Сан-чурагайлыг хөгжүлде биле Культура яамыларының болгаш Культура болгаш дыштанылга парыгының дирекциязының кады ажылдажылгазының ачызында боттанган.
«Бистиң чурттакчы чонувус болгаш аалчыларывыс хөй болганда, бо дээрге дыка чугула болгаш бурунгаар көрүштүг төлевилел деп санаар мен. Амдыызында 3 точканы ажыттывыс. Дараазында чылдарда база каттышкан төлевилелдеривисти боттандырар бис» — деп, Тываның культура сайыды Виктор Чигжит дыңнаткан.
Халас болгаш хөй-ниитиге чедингир интернетти парктың төп болгаш барыын девискээрлеринге ажыглап болур.
«Национал парктың девискээринде партнёрувус «Ростелеком» компаниязы-биле кады тодараткан черлеривисте хөй-ниитиниң үш Wi-Fi точкалары бар. Ол үш точкага Wi-Fi системазын кожуп, чонга интернетче кирип болур девискээрлерни ажылдап кылдывыс» — деп, ТР-ниң Чурагайлыг хөгжүлде сайыдының хүлээлгезин күүседип турар Эдуард Ховалыг чугаалаан.
Wi-Fi-га “Күрүне ачы-дузазы” порталы таварыштыр, СМС-чөпшээрел болгаш мобильдиг телефон дугаары-биле коштунуп алыр. Коштунарының айыыл чок чоруу хууда медээлерни камгалаар дугайында Россияның хоойлузу-биле хандыртынган. Хереглекчиниң медээлери чүгле четкиже киирерин хандырар сорулга-биле ажыглаттынган болгаш камгалаттынган болур.
«Ростелеком» компаниязының төлээзи Виктор Оюн база массалыг харылзаа четкизин тургузарынга компанияның киржилгезин тайылбырлаан: «Чурагайлыг хөгжүлде болгаш Культура яамыларының дилээ-биле хөй-ниитиге Wi-Fi-ны организастаан бис. Бүгү парктың улуг кезии интернет четкизи-биле хандыртынган».
Келир үеде немелде Wi-Fi точкаларын найысылалдың «Азия төвү» скульптурлуг комплекске, Арбат шөлүнге база Аныяктар сесерлиинге тургузарын планнаан. Ынчалза-даа организакчылар аңаа доктаавайн, тус чер тургузугларынга база массалыг харылзаа четкизин салырын көрүп турар.
Бистиң корр.
Буян ООРЖАКТЫҢ тырттырган чуруу.
“Шын” №34 2026 чылдың сентябрь 3
"Шын" солуннуң МАХ-каналынга каттыжыңар: max.ru/channel_shyn