Беш хүн улаштыр найысылалдың чурттакчыларын болгаш аалчыларын И.Г. Сафьянов аттыг орус культура төвү шагааладып келген. Сайгарлыкчылар деткиир фондунуң культура одаа-биле кады ажылдажылгазының түңнелинде Тываның ус-шеверлери кылган ажылдарын чонунга сонуургадып, чылыг-чырык, эптиг байдалга садып-саарар аргалыг болган.
Иштики херектер шугумунуң хоочуну, хостуг үезинде аргыттынар Чечен Шаравии хоорайда болуп турар садыг-делгелгелерден черле чыда калбас. Ооң өшкү чөөгүнден, янзы-бүрү өңнүг чүңнер, хендирлерден аргаан амгы үениң бөрттерин, телефон сугар аргаан бичии кымзарларын аныяктар амырап алырлар. «Мында дыка эки байдал тургустунган-дыр. Бис чүгле бараанывыс садарынга өйлешпейн, культура ажылдакчыларының эрттирип турар солун хемчеглерин магадап, хуужуур, пиң далган, манчы-бууза кылыр мастер-класстарын сонуургап, амзап, четтирип-даа олурар-дыр бис. Манчы чииринге мөөрейлешкен улусту-даа, тевек тепкеннерни-даа аажок сонуургадывыс. Ажыл-иш хайныгып турар өргээде аяк шай-даа, изиг аъш-чем-даа элбек, сонуургап келген чон-даа хөй болду» – деп, ол өөрүшкүзүн үлешти.
Кылымал кеш, ватин туткан чугажак чараш тыва тоннар ам-даа элээн бар болду. Ооң чылдагаанын билир болгай бис: сооктар ам-даа хевээр, казыыр 35-36 градустар турда, чараш тон кедеринче далашпайн турарывыс ол. Бир эвес эртежик чылып, хар мөндүңейнип, эрип эгелээн болза, чараш тоннарны былаажып тургаш, садып аппаар-ла ыйнаан.
Өңгүр кылдыр шиметтинген чараш садыг-делгелгениң база бир эптиг талазы чүү болганыл дээрге, ээлери бараанын олурган черинге хондур арттырып каары болган.
Оюн-тоглаа, ажыктыг мастер-класстар, амгы үеге дүүштүрген тыва идик-хеп көрүлдези, мөөрейлер, ыр-шоор, танцы-сам-биле катай-хаара болган садыг-делгелге кайы-даа талага ажыктыг болган. Хереглээн бараанын садып алыр дээш келген улус оюн-тоглаа, мастер-класстарга-даа киришкен. Шагаа уткуштур чараш белектер садып алганынга сеткили ханганы чугаажок. А бодунуң холу-биле бүдүрүп алган бараанын делгеп, садып олурар улус база-ла байырлалдың онзагай хемчеглериниң херечилери, киржикчилери болган.
Надежда КУУЛАР.
Чуруктарны интернеттен хоолгалаан.
“Шын” №6 2026 чылдың февраль 19
