Олимпиада чемпиону П. Пинигинниң сүмелери

Делегей чергелиг IV сарыг шажын шуулганынга Саха-Якутияның алдарлыг оглу, хостуг хүрешке 1976 чылда Монреаль Олимпиадазының 68 килге чемпиону Павел Павлович Пинигин база Бурятияның Селенга районунуң чагырыкчызы, хостуг болгаш грек-рим хүрештерге ССРЭ-ниң, Россияның спорт мастери Станислав Дашиевич Гармаев оларны ТР-ниң спорт сайыды Владимир Түлүш аэропортка уткуп ужурашканнар.
Павел Пинигин сайыт-биле ужуражып чугаалашкаш, хостуг хүреш мөгелериниң, тренерлериниң аразында кады ажылдажылганы чорударын дугурушканнар. Аалчы 2022 чылда Кызылга чорааш, бистиң шыырак мөгелеривис, тренерлеривис-биле баш удур чугааны кылганы ажыктыг болган. Ооң соонда якут тренерлер Чадаанага бичии мөгелери-биле кады белеткелди чорудуп турар апарганнар. Алдарлыг мөге ужуражылга соонда сайыттың чалалгазы-биле “Хүреш” стадионунга Республика хүнүнде бичии оолдарның Наадым хүрежин сонуургап көргеннер. Дараазында аалчыны “Херел” спорт залынче чалап, хостуг хүреш мөгелери-биле ужуражып, оларга “Мерген өөредиг кичээлин” эрттиргени солун болган.
Тываның Баштыңы Владислав Ховалыг аалчы-биле ужуражылганы эрттирген. Ужуражылга үезинде алдарлыг мөге бичии мөгелерниң белеткелин уруглар садындан эгелээнин улуг сонуургап чугаалаан. Ол ышкаш дараазында якут, тыва, бурят, моол назы-хар аайы-биле шыырак мөгелериниң кады белеткелдерин эрттирер деп бодалдарын сүмелеп чугаалашкан. Бо талазы-биле баштайгы белеткелди Саха-Якутияга, дараазында Тывага, Моолга, Бурятияга чорударын дугурушканнар. Алдарлыг мөге сарыг шажын шуулганын 5 чыл аттыг стадионга, Арат шөлүнге, хөгжүм-шии театрынга, Улуг хүрээге улуг сонуургал-биле магадап көрген. Хостуг үелеринде "Херел" залынга “Мерген өөредиг кичээлдерин” үргүлчү күзели-биле чорудуп, мөгелерниң хей-аъдын көдүрүп турганы кажан-даа уттундурбас. Сөөлүнде регионнуң спорт сайыды хүндүлүг аалчыларга быжыг кадыкшылды база демниг спортчу чедиишкиннерни күзеп байырлашкан.

/ Алексей ЧАМБАЛ-ООЛ, спорттуң хоочуну.
Чуруктарны “Тыва спорт” каналдан база ТР-ниң Спорт яамызының социал четкиде арнындан алган.
«Шын» №33 2026 чылдың август 27

"Шын" солуннуң МАХ-каналынга каттыжыңар: max.ru/channel_shyn