РФ-тиң Чазааның Даргазы Михаил Мишустин Ыраккы Чөөн чүк болгаш Сибирь регионнарынга үнүүшкүннүг хыналдазының түңнелдерин таныштырар дээш, Чазак кежигүннери-биле хуралды эрттирген. Чазак Даргазы хыналда үезинде Тыва Республикада көдүртүнген айтырыгларны шиитпирлээр база социал-экономиктиг эгелээшкиннерни деткиир дээш, элээн каш даалгаларны берген.
«Тываның экономиказы болгаш социал сектору бот-тускайлаң хөгжүлде программазының ачызында эки түңнелдерни чедип ап, тудуг материалдарының бүдүрүлгезин чаартканындан чуртталга бажыңнарының, школалар, эмнелгелер тудуу дүргедээн» - деп, Мишустин хуралды ажыдып тура демдеглээн.
Сөөлгү 7 чылда регионда школа назыны четпээн уруглар өөредилгезиниң чедингири 88-тен 95 хуу чедир өскен. 2020 чылдан бээр 1800 ажыг олуттуг 31 уруглар садтарын база 8500 ажыг олуттуг 12 чаа школаларны туткан. Оон аңгыда 53 школада капитал септелге ажылдарын кылган. Ол хемчеглер республиканың школаларында үш ээлчегде өөренирин бүрүнү-биле чок кылып, ийи ээлчеглиг ажылдаар албан черлериниң санын эвээжеткен.
«Консультация-диагностика төвүнге четкенивис соонда, чүрек болгаш бүүрек аарыгларын тодарадыр амгы үениң дериг-херекселдерин садып алырынга федералдыг акшаландырыышкынны тускайлаар дугайында шиитпир хүлээп алдынган. Оон ыңай, бистиң дилээвис-биле, чогуур федералдыг программаже элээн каш школаларның болгаш уруглар садтарының улуг септелгезин киирер» - деп, Тываның Баштыңы МАКС-та бодунуң каналынга дыңнаткан.
Михаил Мишустин чүрек-дамыр болгаш бүүрек аарыгларын тодарадыр бедик технологиялыг дериг-херекселге акша-хөреңгини тускайлаарының дугайында документилерниң белеткелин контрольдаар даалганы Чазак Даргазының оралакчызы Татьяна Голиковага берген.
Чазак Даргазының оралакчызы Дмитрий Чернышенко Россияның Чырыдыышкын яамызы-биле кады Тыва Республикада элээн каш школалар болгаш уруглар садтарын өөредилге объектилерин эде чаартыр программаже киирер ажылды кылыр даалганы онааган.
Чазак Даргазының регион баштыңнары-биле ужуражылгаларын барымдаалап, даалгалар даңзызын белеткээр.
Тываның Баштыңы Владислав Ховалыг Михаил Мишустин-биле ужуражылга үезинде регионда 29 школаның болгаш 15 уруглар садының капиталдыг септелгезин федералдыг эде чартылга программазынче киирерин дилээн.