Май 31-де Эрзин кожууннуң Эрзин сумузунга тускай шериг операциязының маадыры, республика чергелиг "Хендирбе сый шанчар" оюннарның дөрт дакпыр тиилекчизи Айдыс Кыргыстың чырык адынга автомашина шаңналдыг маргылдаа болуп эрткен. Маргылдааны А.А. Кыргыстың өг-бүлези, Эрзинниң спорт школазы база К.Б. Ондар аттыг Тыва үндезин культура төвү демнежип эрттирген.
Хемчегниң кол аалчылары — Бурят Республиканың Национал оюннар федерациязының даргазы Гомбо Зурбаков баштаан бөлүк Маадырывыс А.А. Кыргыстың чаңгыс эвес удаа "Алтан Мундарга" деп делегей чергелиг бурят чоннуң эрттирип турары фестивальдың киржикчизи чораанын сактып, чыылганнарга чугаалап турганнар:
“Бистиң Федерациявыс кежигүнү Айдыс Артуровичиниң чырык адынга тураскааткан маргылдаа тулган эки деңнелге бедик хей-аът көдүрлүүшкүннүг эрткен деп демдегледивис. Киржикчилер хендирбе сый шаварынга тулган дээн уран аргаларын көргүстүлер. Организастап эрттирип турары болгаш шаңнал фондузу дыка шыырак-тыр.
Аарыкчыларның деткимчези маргылдаа киржикчилериниң хей-аъдын улам көдүрүп турарын көргеш, магадап, Тывада бо оюн нептереңгей апарган-дыр деп билдивис. Акы-дуңмалышкы төрел чонувус тывалар силер-биле кеткен хевивис-даа, арын-шырайывыс, аажы-чаңывыс-даа дөмей, национал ойнап чоруур оюннарывыс база дөмей болуп турарынга, Тывада чедип келгенивиске аажок өөрүп тур бис.
Бодувуска ажыктыг чаа чүүлдерни база көрүп алдывыс, чижээ, Моолда болгаш Тывада хендирбе сый шаварда, шала олура аарак арганы ажыглап турар болза, бисте ындыг арга кым-даа ажыглавайн турар. Ол ышкаш киржикчилерни хар-назын аайы-биле аңгы бөлүктээри черле күзенчиг деп көрдүвүс. Аравыста удур-дедир арга-дуржулга солчулгазы үре-түңнелдиг болганынга өөрүп тур бис” – деп, маргылдаа эрткенде, Тыва үндезин культура төвүнге болган түңнел ужуражылгага бурят делегацияның кежигүннери сөс ап, демдеглээн.
Ниитизи-биле маргылдаага республиканың аңгы-аңгы кожууннарындан шупту 63 хендирбечи киришкен. Изиг-изиг эрткен автомашина шаңналдыг оюннуң түңнелинде, шаңналдыг черлерни дараазында киржикчилер чаалап алганнар:
Тес-Хем кожууннуң төлээзи Алексей Дапый-оол (47 харлыг) 4-кү черни ээлээн, Каа-Хем кожуунну төлээлеп келген Омак Монгуш (41 харлыг) 3-кү черге төлептиг болган. Эрзин кожууннуң аныяк хендирбечизи Дозураш Дирчинчап (16 харыг) 2-ги черни алган.
Маргылдааның тиилекчизи болган Улуг-Хем кожууннуң төлээзи Булат Буддаев автомашинаны шаңнал кылдыр алгаш, дарый Маадырның оглунга белек кылдыр дамчыдып бергени үлегерлиг чорук кылдыр көстүп, төөгүге балалбас исти арттырган.
Болган маргылдаа бурят-тыва чоннар аразында эп-найыралды улам быжыктырып, бурун шагдан бээр хей-аът көдүрер национал оюннарның бирээзин ам-даа утпайн, ойнап чорууру, национал ёзу-чаңчылдарны кадагалап арттырарынга улуг деткимче болгаш Тываның төлептиг оолдарының хей-аъдын көдүрген, ТШО киржикчизи маадырның чырык адынга улуг хүндүткелди илереткениниң демдээ болган.
Бистиң корр.
Медээ болгаш чуруктарны Тыва үндезин культура төвүнден алган.
