Тыва биле Моолду харылзаштырып турар «КрасАвиа» авиалиния Кызыл – Улан-Батор аразынга делегей чергелиг маршрутта пассажирлер аргыжылгазын эгелээн. Амгы үениң АТР-42 лайнерниң ужудуушкуннары октябрь 2-ге чедир уламчылаар болгаш четвергте Кызылдан 22 шак 05 минута турда, пятницада Улан-Батордан 5 шак 05 минута турда ужуп үнер. Билеттиң өртээ ужар хүнүнден хамааржыр база 11065 рубльден эгелээр.
Кызыл – Улан-Батор аразынга дорт авиарейс эрткен чайын ажыттынганын сагындыраал. Регионнар аразында төөгүлүг харылзааларны быжыглаарынга база Тыва биле Моолдуң аразында транспорттуң чедингир чоруун хөгжүдеринге ол чугула базым болган. Авиабилеттерниң чиик өртээн хевээр арттырар дээш, Тываның Чазаа ол маршрутта ужудуушкуннарны республика бюджединден субсидиялаарын шиитпирлээн.
Президент Владимир Путинниң база Россияның Чазааның деткимчези-биле бо төлевилелге херек бүгү-ле инфраструктураны тургускан. Ужудуп-хондурар шөлдү чаартыр, аэропорттуң чер кырында хүн бүрүнүң ажыл-чорудулгазын делегей стандарттарынга дүүштүр организастаан, каайлы-кызыгаар ажылының аңгы терминалын туткан.
Республиканың эрге-чагыргазы төп аэропортту долгандыр девискээрни чаагайжыдарын уламчылап турар. Апрельде IV делегей чергелиг буддийжи шуулганга белеткенип, Кызылдың аэропортун долгандыр девискээрде чаагайжыдылга ажылдары апрельде-ле эгелээн. Төлевилелде аэровокзалче чедип алырынга элээн эптиг байдалды тургузуп, 500 автомашина тургузар черни тудары төлевилелде кирген.
Бо рейсти ажытканы-биле Тываның чурттакчылары болгаш республиканың аалчылары кожа-хелбээ Моолдуң найысылалынче дүрген болгаш эптиг чедип алырындан аңгыда, өске чурттарже улаштыр ужуп чоруптарынга эптиг арганы алган. Ам аян-чорукчулар Улан-Батордан Кыдаттың (Пекин, Гонконг), мурнуу Көреяның (Сеул), Японияның (Токио) болгаш Азияның өске-даа чурттарының улуг хоорайларынче ужуп болур.