Авам-биле хой кадарып чораан бис. Ол адаамда ийден: «Бээр келем, оглум!» — дидир. Маңнап чеде бердим. Көөрүмге, авам койгун оглу кужактап алган тур. «Кайыын тып алдың?» — дидим. «Дыт дөзүнге хоруй берген чыдыр. Тут! Артыңда бирээ тура халыды!» — деп алгырды. Хая көрнүп кээримге, дыт дөзүнде койгун оглу олур, тура халып чыдырда, ооң будундан сегирип алдым. Ам мырыңай ийи койгуннуг болган бис. Ынчап турувуста, ооң иези маңнап келгеш, оолдарын хопталап, караа борбаңайнып, додуңайнып хөлчок. Авам кээргээш, ооң ийи оглунуң бирээзин салып бериптерге, койгун оглун эдертип алгаш, маңнап чорупту. Бирээзин өгге эккелгеш, сүт ижиртиримге хоржок. Өскүс хураганнар эмискиктээр эмискиивис бар чүве. Ону тыпкаш, эмискиктеп өөредип алдым. Ыттар тудуп кааптар дээш, хааржакка суп турдум.
Ай эрткен. Койгун оглу элээн доруга берген. Ол сүттү боду тавактан ижип алыр апарган. Дөрге салыптарга, бистиң диизивис-биле мага хандыр ойнаар. Даштыгаа Мойнакпан көөр болза, тудуп кааптар, ынчангаш бир хүн ийи-чаңгыс үндүрер бис. Сигенни даштыыртан чулгаш, хааржактың азыынга салып каар мен. Дүне када дыңнаарга, дайнанган чыдар. Ам анаа салыпкан бис. Орун адаанга чизиредир маңнап-ла турар. Эртен эрте авам шай хайындырып олурда, хос адаандан үне халып келгеш, дөрде сүт манап орар. Авам чылбай сүттү кудуп бээрге, ижип алгаш удуй бээр.
Күс дүшкен. Мен өөренир деп барган мен. Ол дүне койгунум хос адаанга хонган. Ам шуут сүт ишпестээн, сиген чиир, семизи хөлчок. Бир-ле эртен койгунум хос адаандан үнмеди. Канчап барган чоор дээш көөрүмге, бо дүне чаъс чаапкан, малгашта койгун изи аргаже кире болду. Ыт изи мүн-не чок. Бир болза ооң иези эдертип аппарган боор. Че, харын, чер баарлыг амытанның оозу шын-даа ыйнаан. Оон өөренип чорупкан мен.
Койгун оглу ам та кайда? Чок-ла болза кокпазында улуг койгун апарган атпаалыктап чор боор. Ындыг-ла болза эки. Ак сүт ижип өскен койгунну ам кыжын көөр болза, ак хар-биле дөмей. Ооң чүгле кокпазынга шоюшкак изин көрүп боор. Койгун изи көргеш-ле, Манчүрекке сүт-биле эмискиктеп өстүрген койгунаамны сактып кээр мен.
Омак ОНДАР.
/ «Дамырак-3» номдан алган.
Чурукту ГигаЧатка чураан.
“Шын” №27 2026 чылдың июль 16
"Шын" солуннуң МАХ-каналынга каттыжыңар: max.ru/channel_shyn