Доозукчулар спартакиадазы
Өвүр кожууннуң Хандагайты ортумак школазының доозукчуларының чыл санында спартакиада эрттирери чаагай чаңчыл апарган. Бо чылдың май 2-3 хүннеринде Хандагайтының спорт школазынга болгаш Доржу Казакин аттыг стадионга Доозукчулар спартакиадазы болуп эрткен.
23 чыл уламчылап турар спартакиаданың организакчылары бо чылын 2001 чылдың доозукчулары спортчу хемчегни бедик деңнелге эрттирген. Чылдан чылче доозукчулар саны немежип, спортчу оюннарның шынары улам-на бедип, негелделер шыңгыырап, чараш чүүлдерни киирип эрттирип турарын кожууннуң чагырга даргазы Айдыс Куулар спартакиаданы ажыдып тура чугаалаан.
Кадык овур-хевирни суртаалдаан, чаңгысклассчыларның найыралын быжыктырган спартакиадага 2001-ден 2013 чылдың доозукчулары киришкен.
Доозукчулар командалары хол бөмбүү, баскетбол, хөглүг старттар, дартс октаар, стол теннизи, канат тыртар оюннарга мөөрейлешкен. Маргылдаалардан аңгыда, доозукчулар башкыларын алгап-мактап, четтиргенин илереткеннер.
Спартакиада үезинде Хандагайты ортумак школазының доозукчулары Анжелина Монгуш биле Альберт Сатка «Тыва Республиканың күш-культуразының болгаш спорттуң тергиини" деп хөрек демдектерин кожуун чагырга даргазы Айдыс Куулар тывыскан.
Алдын Тестиң даңгыназы
Бурун Тываның төвү Самагалдайга «Алдын Тестиң даңгыназы-2026» деп чараш кыстар мөөрейи болуп эрткен. Аңаа бүгү кожуундан эң-не салым-чаяанныг, спортчу, идепкейжи чараш кыстар киришкен.
Мөөрейниң түңнелинде “Көрүкчүлерниң үнелели» болгаш «Алдын Тестиң алдын даңгыназы» деп дээди шаңналды Джулиана Дангыт алган. «Алдын Тестиң мөңгүн даңгыназы» болгаш «Чечен-мерген даңгына» деп шаңналдарга Өлчей Дондуй төлептиг болган. «Алдын Тестиң хүлер даңгыназы” болгаш «Алдын Тестиң эртинези» шаңналдарны Кара-Кат Чанчыкаага тывыскан.
Дараазында номинация аайы-биле тергиидээн даңгыналар:
«Алдын Тестиң чоргааралы», «Бот-тускайлаң даңгына» — Александра Дупшун;
«Хаак дег ээлдек даңгына», «Чоннуң үнелээн даңгыназы» — Ай-Кыс Бадарчы;
«Айлаң куш дег өткүт үннүг даңгына», «Уран-чаяалгалыг даңгына» — Валентина Попова;
«Уран-чаяалгалыг даңгына» — Алдын-Доос Ак-оол;
«Чойган сынныг даңгына» — Нарина Лодай-оол.
Чаштар — келир үевис
Сүт-Хөл кожуунга Россияга чарлаттынган Чоннарның чаңгыс деминиң чылынга тураскааткан “Чаштар — келир үевис” деп чараш мөөрей болуп эрткен. Кожууннуң школа назыны четпээн уруглар албан черлериниң башкылары, кижизиттирикчилери, ада-иелери база аарыкчылары Суг-Аксының культура одаанга чыглып келген. Ниитизи-биле 8 уруглар садының чаштары “Россияның чоннарының танцылары” болгаш “Тыва национал сам” деп ийи мөөрейге салым-чаяанныын көргүзүп мөөрейлешкен.
Түңнелинде ниити танцыга “Дииңчигеш” уруглар садының чаштары “Зүүгедей шог” деп бурят самны күүсеткеш, дээди шаңнал Гран-приге төлептиг болганнар. Бирги черни — “Сайзанак” уруглар сады коряк самны, 2-ги черни — “Чечек” уруглар сады “Камажай” деп казах танцыны база “Хүнчүгеш” (Алдан-Маадыр) узбек чоннуң самын, 3-кү черни “Хүнчүгеш” (Ишкин) уруглар сады орус чоннуң “Калинка-малинканы” база “Челээш” (Кара-Чыраа) якут самны күүсеткеш алганнар.
Тыва национал самга “Чинчи” (Суг-Аксы) уруглар сады тергиидээш, Гран-прини алганнар. 1-ги чер — «Сайзанак» (Суг- Аксы), 2-ги чер — «Челээш» (Кара-Чыраа), 3-кү чер — «Челээш» (Бора-Тайга).
Бо мөөрейни эрткен чылгы тиилекчилер “Дииңчигеш” уруглар сады бедик деңнелге организастаан (эргелекчизи Сайзана Ооржак). Келир чылын эрттирер эргени Ак-Даш сумузунуң “Чечек” уруглар сады алган, оларга дамчып чоруур Кубокту тывыскан.
/ А. СОЯН белеткээн.
Медээлерни болгаш чуруктарны Өвүр, Тес-Хем, Сүт-Хөл, Чөөн-Хемчик кожууннарның социал четкиде арыннарындан алган.
“Шын” №17 2026 чылдың май 7
"Шын" солуннуң МАХ-каналынга каттыжыңар max.ru/join/egenQ...