Ногаажы арга-сүмези-биле үлешкен
Арыскан суурнуң эрес-кежээ ногаажызы, социал керээге үндезилээн күрүне деткимчезин алган Саяна Сат чылдың-на январь–февраль айларда соңга караан долдур бичии саваларга өзүмнерни тарып алыр.
Херээжен чон бажыңнарының даштынга чүзүн-баазын өңнүг чечектерни олуртуру чаңчыл апарган. Саяна Сат эгелеп чоруур ногаажы аныяк аваларга арга-сүмезин кадып, мастер-класстарны сумуларда эрттирип турар.
Бо удаада арга-дуржулгалыг ногаажы Культура бажыңынга чечектер эустома, петуния өзүмнерин канчаар тарыырын, чара олуртурун, суггарарын, чемишчидерин база хөрзүн кыспас кылдыр чүнү холуурун аваларга айтып берип, тайылбырлаан.
Хемчегни сонуургап келген херээжен улус арга-дуржулгазын солчуп, тарып алган хөй чечектериниң өзүмнери-биле үлешкен.
Ногаажылар удавас чечектер база ногаа өзүмнерин садып эгелээр. Чайын Саяна Саттың чурттап турар бажыңын долгандыр олурткан чараш чечектери саглаңнадыр частып келир.
Ийи-Талдың эр чонунуң деми
Улуг-Хемниң Ийи-Тал сумузунуң эр чону чагырыкчызы Алдын-оол Болат-оолдуң удуртулгазы-биле сумунуң девискээрин аштап-арыглаарының дугайында база берге айтырыгларын сайгарып чугаалашкан.
Ооң түңнелинде эрткен дыштаныр хүннерде эр чон шупту чыглып алгаш, сумунуң хөөрүнүң девискээриниң богун чаңгыс хүн дургузунда аштап-арыглап каапкан.
Эр улустуң шак-ла мындыг чыыштары кварталда бир катап эртип турар. Ол чыыштарга чүгле сайгаржып чугаалажыр эвес, а берге айтырыгларны демниг шиитпирлеп, ёзулуг ажыл-херекти кылып турар. Эр хейлер, ийи-талчылар!
«Сорунза» 25 чылдаан
Шагаан-Арыг хоорайның культура төвүнге «Сорунза» хоочуннар болгаш пенсионерлер клувунуң 25 чыл оюн демдеглээн.
Бо хүнде клубта 39 кижи бактаап турар. Оларның аразында 60-70 хар иштинде 15, 71-ден 80 харга чедир 13, 81-ден 90 харга чедир 11 хоочун бар. Олар назы-харының аайы-биле дөрт аңгы бөлүкке чарлып алгаш, хөй-ниити ажылдарындан, фестиваль-мөөрейлерден, спортчу оюннардан чыда калбайн, киржип турар.
Кожууннуң Төлээлекчилер хуралы идепкейжилерни юбилейлиг медальдар, Шагаан-Арыг хоорайның чагыргазы «Шагаан-Арыг хоорайның хүндүлүг чурттакчызы» деп хөрек демдектери-биле шаңнап-мактаан.
Дайын чылдарында бичии үелери эрткен хоочуннарга «Дайын уруглары» деп медальдарны тывыскан.
Шагаан-Арыгның бир дугаар школазының өөреникчилери, “Он-Кум” мода болгаш костюм театры ыры-самын бараалгаткан.
Сорунзажылар аалчыларга солун концертин бараалгаткан.
Хемчегниң хөй санныг аалчылары могаг-шылаг билбес хоочуннарга байыр чедириишкиннеринге каттышкан.
Буянныг чорук хүнүнде…
Апрель 18-те — Буянныг чоруктар хүнүнде «Ногаан десант» школа музейиниң идепкейжилери часкы субботникти организастаан.
Эрзин школазының 5 «Б» клазының өөреникчилери, төөгүнүң элээди кадагалакчылары Бүгү-делегейниң тураскаалдар болгаш төөгүлүг черлер хүнүнге боттарының күш-ажылы-биле буянныг чоруун көргүскен. Олар кожуун төвүнде тураскаалдарны база Эрзин хемниң эриин дургаар чыылган кыштаан бок-күзүрүмнү аштап-арыглаан.
«Чыргал-Хаанның» чедиишкини
Эрзин кожуунуң Нарын сумузунуң культура одааның «Чыргал-Хаан» ыры болгаш танцы ансамбли «Өндүр улуг чуртум» деп делегей чергелиг мөөрейге киришкеш, I чергениң лауреаттары бооп, дээди шаңналга төлептиг болганнар. «Чыргал-Хаан» ансамбльдиң удуртукчузу, ТР-ниң культуразының тергиини Сайдаш Моргай, хореограф башкызы Зульфия Комбу. Лауреат атка төлептиг болган ансамбльге чайынналчак чедиишкиннерни чаңгыс чер чурттуглары күзеп турар.
/ Бистиң корр.
Чуруктарны болгаш медээлерни Улуг-Хем, Эрзин кожуун чагыргаларының социал четкиде арыннарындан алган.
“Шын” №15 2026 чылдың апрель 23
"Шын" солуннуң МАХ-каналынга каттыжыңар https://max.ru/join/egenQjfuGzdL6mt0tSEaIo13rmlpMRQzzSnZQdqfHFY