Октябрь 6-да Улусчу фронтунуң Чүлдүм кудумчузунуң 40А дугаарлыг бажыңында штавынга Республиканың кеш-шээр аарыглар диспансериниң төлээзи Шончалай Ондар, ТР-ниң Чонну ажылга хаара тудар төвүнүң даргазының оралакчызы Начын Ооржак болгаш Улуг-Хем кожууннуң Арыг-Бажы сумузунуң «Үш-Мөөрүк» волонтержу штавының удуртукчузу Инга Кыргыс олар гуманитарлыг ачы-дузазын эккеп хүлээткен.
Шончалай Ондарның дыңнатканы-биле алырга, Республиканың кеш-шээр аарыглар диспансериниң коллективи квартал санында гуманитарлыг дузаны чорудуп турар. Бо удаада олар техника септээринге чугула херек дүлгүүрлерни болгаш ийи генераторну боттарының чыгган акшазы-биле садып эккелген. Ниитизи-биле 180 муң рубльдиң дериг-херекселин хүлээтти.
Арыг-Бажы ортумак школазының директору Инга Кыргыс директор ажылындан аңгыда, волонтержу штабты база тускай шериг операциязы эгелээнден бээр удуртуп келген. Ооң бөгүн кады келген командазы Арыг-Бажы ортумак школазының 6-гы классчылары. Оларның бирээзи Чимит Дүвендейниң чугаалааны-биле алырга, школачылар боттарының бижээни чагааларны болгаш кызыл сөөскенден кылган камгалал кымчыларны эккелгеннер.
Республиканың Чонну ажылга хаара тудар төвүнүң директорунуң оралакчызы Начын Ооржактың чугаалааны-биле алырга, олар бо удаада коллективтиң ажылдакчыларының чыгган акшазы-биле саткан генераторларны болгаш тускай шериг операциязында оолдарга хей-аът көдүрер чагааларны хүлээткен.
Улусчу фронтунуң күүсекчи комитединиң регионалдыг салбырының удуртукчузу Саима Далчинниң дыңнатканы-биле алырга, гуманитарлыг ачы-дуза чыылдазы октябрь 21-ге чедир үргүлчүлээр. Ниитизи-биле 40 тоннадан эвээш эвес чүъктү октябрь 23 бетинде чорудары планда көрдүнген. ТР-ниң Баштыңы Владислав Ховалыгның даалгазы-биле ЛУР, ДУР болгаш Запорожье дээш регион бүрүзүнге гуманитарлыг ачы-дуза чедер ужурлуг.
«Гуманитарлыг ачы-дузаның күскү чыылдазы эгелээн. Чаңгыс чер чурттугларывыс идепкейлиг киржир дээрзинге идегеп тур бис. Дайынчыларывыс Тывадан баар гуманитарлыг ачы-дузаны манап турар. Соок кыш удур генераторлар, теплопушкалар болгаш дроннар, детекторлар дээн ышкаш техниктиг дериг-херексел чугула херек. Оон ыңай күскү өңнер-биле аргаан чажыртынар четкилер база эң-не херек» – деп, Саима Далчин чугаалады.
Дайынчы хөделиишкиннер девискээринче гуманитарлыг ачы-дуза чорудуксаза, Кызыл хоорайның Чүлдүм 40А дугаарлыг бажыңында Улусчу фронтунуң штавынга чедип келирин дыңнадып тур. Харылзажыр дугаары:
20-10-50
Улусчу фронтунуң регионалдыг салбыры Тыва Республиканың Чазаа-биле кады «Шупту чүүлдү Тиилелге дээш!» федералдыг акцияның деткимчези-биле күүседип турар дээрзин сагындыраал.
Айдың ОНДАР.
Буян ООРЖАКТЫҢ тырттырган чуруу.
“Шын” № 39 2026 чылдың октябрь 8
"Шын" солуннуң МАХ-каналынга каттыжыңар: max.ru/channel_shyn