Бичиимден билип кээримге-ле, ада-ием мал ажыл-агыйынга ажылдап чораан. Ачам чылгычылап, хоюн кадарып, малын семиртири-биле чайлагладып, күрүнеге эът планы дээш ажылдап-ла чораан. 9 класс доозар үемде ачам бистиң аравыстан ырай бээрге, авам мени чайгы дыштанылгамда алгаш, ол чылын база-ла семирткеш дужаар турган хоюн тайгаладып үндүре берген. Чайгы үеде кодан-коданы-биле 300-400 баш хойну кыргып, чугдуруп, семирткеш, күзүн совхозка дужаап бердивис.
Оон эгелээш-ле көдээ ажыл-агыйны сонуургап, техникумну дооскаш, Сүт-Хөл кожууннуң Ак-Даш сүт-бараан фермазының боозадылга пунктузунга ажылдай бердим. Кыш-чай чок хураганнар дугаарлап, чаш мал төлүн чидириг чок камгалап ап, мал чеминиң белеткелинге тонна-тонна сиген, силос белеткели дээш чылдың дөрт эргилдезинде ажылдап-ла чордувус.
Комсомолчу аныяктар Манчүректиң малчыннарының кыштагларының аразынга кылаштажып чорааш, кажааларын коптарып, чылыглап, малгаштап берип чүнү кылбадывыс дээр. Ол үелерде кады ажылдап турган эштерим Елизавета Маадыр-ооловна, Лариса Ак-кысовна, Виктор Чассыг-оолович дээш өскелер-даа бо чүүлдү номчааш, сактып кээрлер боор.
Мени бо ажылга турум, бердинген кылдыр өөредип каан угбам Чаймаа Карымааевнага (аравыста чок-даа болза) ам-даа чоргаарланып чоруур мен.
Бодум бөдүүн осеменатордан совхозтуң кол экономизинге чедир ажылдааш, хүндүлүг дыштанылгаже үнгеш, бо хүннерде хуу ажыл-агыйларда ажылдап чор мен. «Ажыл кижини каастаар» деп үлегер домакты чиге-ле сөглээн-дир.
/ Тамара МАРТАА.
“Шын” №35 2026 чылдың сентябрь 10
"Шын" солуннуң МАХ-каналынга каттыжыңар: max.ru/channel_shyn