Тес-Хем кожууннуң девискээринде кайгамчык чараш бойдуска бүргеткен Куран деп бичии арбанда 25 өрегеде 60 хире хоочуннар, инвалидтер база хөй ажы-төлдүг аныяк өг-бүлелер доктаамал чурттап турар. Чайгы үеде дыштанып келген уруг-дарыгның саны-биле чурттакчыларның саны түр када көвүдей бээр.
Куранда өг-бүле бүрүзү дузалал ажыл-агыйлыг деп болур. Улуг картофель шөлдери, ногаа-чимис тарыыр огородтар бажың бүрүзүнде бар. Бода мал тударынга таарымчалыг чер болгаш, өг-бүлелерниң хөй кезии инек мал тудуп турар.
Май байырлалдарының дыштаныр хүннеринде Куранга тарылга ажылдары эгелээр. Бо чылын час узун, соок болганы-биле тарылга ажылдарын соңгаарлаткан. Ам картофель тарыыр шөлдеривисти чардырып, белеткеп эгеледивис. Май- ның сөөлгү дыштаныр хүннеринде картошкавысты олуртур бис.
Часкы үеде "Анаа олурар чайывыс чок, ажыл хөй-дүр" деп кыйгы-биле арыглап, шеверлээшкин ажылдарын база чорудар чаңчылдыг бис. Бажың бүрүзү боттарының бажыңнарын, хериминиң ишти-даштын, девискээринден 50 метр черни арыглап-аштаан.
/ Оюмаа АРАКЧАА, күш-ажылдың хоочуну.
Чуруктарны авторнуң архивинден алган.
“Шын” №21 2026 чылдың июнь 4
"Шын" солуннуң МАХ-каналынга каттыжыңар: max.ru/join/egenQ...