Чазакка понедельник санында болур Аппарат хуралынга Тывада ИХЯ-ның, ОБЯ-ның Кол эргелелиниң, Регион башкарылгазының төвүнүң удуртукчулары илеткелдерни кылган.
Эрткен неделяда, июль 6-дан 12-ге чедир, онза байдалдар бүрүткеттинмээн. Эрге-хоойлу ажылдакчылары 53 кем-херек үүлгедиишкинин илереткен, 41 орук-транспорт хажыдыышкыны демдеглеттинген, ооң түңнелинде 3 кижи амы-тынындан чарылган, 5 кижи кемдээшкиннерни алган. Материалдыг когаралды 34 автомашина ээлери алган. 45 чолаачы эзирик байдалга чорааш туттурган.
Хыналдалыг рейд үезинде Кызыл, Ак-Довурак хоорайлар, Улуг-Хем, Бай-Тайга, Бии-Хем, Сүт-Хөл, Таңды, Тожу кожууннарда 10 садыг точкаларын хынаан түңнелинде, хоойлуга удур арага аймаа садып турган объктилерден 30 литр арага аймаан хавырган.
Ол-ла Аппарат хуралынга социал керээ программазының боттанылгазының дугайында чугаалашкан. Ол талазы-биле ажылды харыылап турар ТР-ниң Күш-ажыл болгаш социал политика яамызының дыңнатканы-биле, эрткен чылга көөрде, программаның боттанылгазының темпизи оожум чоруп турар. Аңаа хамаарыштыр Владислав Ховалыг харыысалгалыг удуртукчуларга тайылбыр ажылын чонга ам-даа күштелдирер даалганы берген. Чүге дээрге социал керээ дузазы-биле чурттакчылар боттарының хууда ажыл-херээн ажыдып, амыдыралын экижидип алыр аргалыг болуп турар.
Оон аңгыда хуралга “Таарымчалыг хоорай хүрээлеңи” федералдыг төлевилелдиң объектилериниң чаагайжыдылгазының түңнелдериниң дугайында чугаалашкан.
Хурал төнчүзүнде Тываның Чазак Даргазы чаа томуйлаашкын: тудуг сайыдынга ажылдап турган Артыш Кыргысты ТР-ниң Чазак Даргазының оралакчызынче депшиткенин чарлаан. Артыш Кыргыс бодунуң удуртуп турганы яамызын харыылавышаан, ооң-биле чергелештир Чазакка тудуг, чуртталга-коммунал ажыл-агыйын болгаш одалга-энергетика комплекизин харыылаар.
/ К. МОНГУШ белеткээн.
“Шын” №27 2026 чылдың июль 16
"Шын" солуннуң МАХ-каналынга каттыжыңар: max.ru/join/egenQ...