Хакас Республика болгаш Тыва Республика талазы-биле күрүнениң күш-ажыл инспекциязының удуртукчузунуң оралакчызы Эдуард Доржу даштыкы хамаатыларны ажылга хүлээп алырының чурумун ажыл берикчилеринге тайылбырлаан.
Специалистиң тайылбырлап турары-биле алырга, бирги болгаш эң-не кол базым — ажыл дилекчизиниң миграциялыг (бир черден өске черже көжери) эрге-байдалын тодарадыры. Ол чүүлден чугула херек документилериниң даңзызы болгаш күш-ажыл керээзиниң түңнел кезээ дыка хамааржыр. Даштыкы хамаатылар Россияның девискээринге түр үеде азы доктаамал чурттап болур, ол ышкаш чурттарның хамаатылары бооп болур — ЕАЭС кежигүннери азы бедик мергежилдиг специалистер.
Эрге-байдалының аайы-биле ажыл берикчизинге даштыкы хамаатыдан ажылдаар чөпшээрел, патент, түр үеде чурттаар чөпшээрел азы хоойлу ёзугаар доктаамал чурттаарын чөпшээрээн документ (ВНЖ) алыры негеттинер. Күш-ажыл керээзин орус дылга бижимел арга-биле чарар, аңаа миграция документилериниң реквизиттерин айтыры албан.
Ол ышкаш үш хонук дургузунда ИХЯ-ның девискээр албанынга даштыкы хамааты-биле күш-ажыл керээзин чарган дугайында дыңнаткан турар ужурлуг. Ол негелделерни күүсетпес болза, административтиг харыысалгага онаажып болур.
Күрүнениң күш-ажыл инспекциязы ажыл берикчилерин торгаал болгаш суд чаргызы үнмези-биле миграция болгаш күш-ажыл хоойлу-дүрүмүн кичээнгейлиг сагыырын сагындырып турар.
/ Хакас Республика болгаш Тыва Республика талазы-биле күрүнениң күш-ажыл инспекциязының медээлеринден.
Чурукту Шедеврумга чураан.
“Шын” №17 2026 чылдың май 7
"Шын" солуннуң МАХ-каналынга каттыжыңар max.ru/join/egenQ...