Ноябрь 13-те Бай-Хаак сумузунга Улусчу фронтунуң Тывада салбырының эгелээшкини-биле «СВОи в спорте» деп республика чергелиг спортчу төлевилел эгелээн.
Таңды кожууннуң чагыргазының дыңнатканы-биле алырга, ТШО-нуң киржикчилери адаптивтиг спорттуң аңгы-аңгы хевирлеринге мастер-классты школачыларга эрттирген.
Бичии спортчулар бижек октаарынга, стол теннизинге, хол бөмбүүнге ойнап шенээннер. Элээн каш шөлдерге аңгы-аңгы кичээлдерни тускай шериг операциязының хоочуннары эрттирген.
Улусчу фронтунуң Тывада салбырының эгелээни чаа төлевилел тускай шериг операциязының хоочуннарынга спорт дамчыштыр идепкейлиг амыдыралче эглип келиринге дузалап, күш-культураже элээдилерни хаара тудар сорулгалыг. Организакчылар көжүп чоруур семинарларны республиканың өске кожууннарынга база эрттирерин планнап турар.
Бистиң корр.
Чуруктарны Таңды кожууннуң чагыргазының социал четкиде арнындан алган.
«Шын» №45 2026 чылдың ноябрь 19
"Шын" солуннуң МАХ-каналынга каттыжыңар: max.ru/channel_shyn