Тываның Чазааның деткимчези-биле Кызылдан чоруткан Улусчу фронтунуң акциязының гуманитарлыг дузаламчызы Запорожье биле Херсон областарында база Луганск Улус Республикада менди-чаагай чеде берген. Улаштыр Донецк Улус Республикаже, Курск, Белгород областарже үнүптер.
Күскү чыылдага ажылчын коллективтер, хөй-ниити албан черлери, бүдүрүлгелер болгаш Тываның сагыш човаачал чурттакчы чону киришкен. Демниг деткимчениң ачызында, ниитизи-биле 70 тонна улуг чүък чыгдынган.
“Кызылдан чоруткан гуманитарлыг дуза Запорожьеде чедип келген. Чаңгыс чер чурттугларывыска өөрүп четтиргенивисти илередип тур бис. Силерниң дамчыткан гуманитарлыг дузаңар үе-шаанда чеде бээр”— деп, Улусчу фронтунуң Тывада салбырының координатору Самба Норбужук дыңнаткан.
Чүъкте 10 чиик машина, 60 ажыг генератор, 180 ажыг камгалал четкилер, 60 ажыг газ плиталары, эмнер болгаш дериг-херекселдер кирген. Бичии уругларның сагыш-сеткилди хөлзедиптер чагаалары – камгалакчыларывыска бүзүрелдиң болгаш оларны бажыңында манап турарының сагындырыы болур.
«Көшкүн» деп кыйгы аттыг дайынчы четтиргенин илереткен: “Тываның Баштыңынга, Чазаавыска болгаш Улусчу фронтуга онза өөрүп четтирдивис. Бодумнуң коллегаларым, Дээди Хуралдың депутаттарынга база улуу-биле четтирдим. Бистиң дайынчыларывыс дээш сагыш човап чоруур волонтёрларга уйгу-дыш чок дүнелериңер дээш четтирдивис. Запорожье биле Херсоннуң дайынчыларының өмүнээзинден Тывавыстың сагыш човаачал бүгү чурттакчыларынга четтирдивис”.
Кажан бөдүүн чурттакчыдан эгелээш депутаттарга чедир бүдүн республика чаңгыс сорулга-биле демин каттыштырыпканы дээрге-ле ёзулуг патриотчу чоруктуң демдээ. Чаңгыс демниг чор- ук – бистиң эң-не улуг күжүвүс деп чүүлдү Тыва база катап бадыткаан.
Аар чүък машиналары бо неделяда планнаттынган шупту черлерге четкен турар ужурлуг. Дузаламчы улаштыр Донецк Улус Республика, Курск биле Белгород областарже оруун уламчылаар.
“Бистиң дайынчыларывыстан четтиргенин илереткен харыы алган санымда-ла, Тываның чону ажыл-херээ-биле боттарының демниин бадыткап турар дээрзинге бүзүрээр-дир мен. Деткимче Луганск болгаш Донецк Улус Республикаларга, ол ышкаш Запорожье, Херсон, Курск база Белгород областарынга Чоннуң чаңгыс деминиң хүнүнде чеде бээри эки демдек-дир!” — деп, Тываның Баштыңы Владислав Ховалыг бодунуң блогунга бижээн.
Бистиң корр.
Чуруктарны В. Ховалыгның соцчеткиде арнындан алган.
“Шын” №43 2026 чылдың ноябрь 5
"Шын" солуннуң МАХ-каналынга каттыжыңар: max.ru/channel_shyn
Дайынчыларга дуза четкен
5 ноября 2026
5