РФ-тиң Президентизиниң хүлээп алыышкын кылыр кабинединге Тываның Баштыңы Владислав Ховалыгның баш бурунгаар бижиттирип алган хамаатылар-биле хууда ужуражылгазы болуп эрткен. Регионнуң чурттакчылары аңгы-аңгы айтырыглары-биле республиканың удуртукчузунга кирген. Келген кижи бүрүзү тода тайылбырны, хамаарылгалыг албан черлери чогуур айтыышкыннарны алган.
Хөй ажы-төлдүг ие, тускай шериг операциязынга чок болган дайынчының өөнүң ишти 11 ажы-төлдү чааскаан азырап орар. Ол Тываның Баштыңындан «Маадыр ие» атты тыпсырынга, чурттаар оран-савазының байдалын экижидеринге, чер участогун бээринге, уруглар садынга олуттар-биле хандырарынга, ажы-төлүн санаторий-курорттарже эмчилээринге дузалажырын дилээн.
“Маңаа чугаалашкан чүүлдеривисти немеп каары чугула. Президентиниң кадет училищезинге хамаарыштыр, уруглар садының дугайында база бижиттинмээн болганда, оларны база немээр херек. Оглу Новосибирскиге шериг албанын эрттирер кылдыр, мурнуку одуругже чорутпазын дээш, дузаны көргүзери чугула” – деп, Владислав Ховалыг чугаалаан.
«Маадыр ие» атты тыпсырының дугайында айтырыгны чугаалажып, чогуур документилерни белеткээринге дузаны көргүзер. Уругларынга эмчи түңнелдери-биле кадыкшыдылга лагерьлеринче болгаш курорт-санаторийлерже халас путевкалар-биле мурнады хандырар. Улуг уругларының бирээзин Бүгү-россияның «Океан» уруглар төвүнче чорударының аргаларын көөр. «Байлак» кадыкшыдылга лагеринге халас путевканы бээр дугайында шиитпир база хүлээп алдынган.
Хууда хүлээп алыышкынче келген хамаатыларның бирээзи – чааскаан чурттап орар Олег Хамсыл. Ооң чаңгыс оглу ТШО-нуң киржикчизи, чок болганының соонда "Эрес-дидим чорук" ордени-биле шаңнаткан. Ол инек садып алырынга дузаны дилээн. Владислав Ховалыг хамаатыны дыңнааш, харыысалгалыг албан черлеринге айтырыгны хыналдага алырын дааскан.
Бо чылды Тургузукчу күш-ажылдың болгаш өг-бүле ыдыктарының чылы кылдыр чарлаттынган болганда, хүн бүрүде ажыл-ишчи үлүг-хуузу-биле ниитилелдиң таваан болгаш регионнуң келир үезин хевирлеп турар күш-ажылдың кижилеринче онза кичээнгейни угландырары чугула деп Тываның Баштыңы онзалап демдеглээн.
А. СОЯН белеткээн.
“Шын” №15 2026 чылдың апрель 23
А.ЕНЗАКТЫҢ тырттырган чуруктары.
"Шын" солуннуң МАХ-каналынга каттыжыңар https://max.ru/join/egenQjfuGzdL6mt0tSEaIo13rmlpMRQzzSnZQdqfHFY