2026 чыл эгелээнден бээр үш ай дургузунда Тывада 299 чиигелделиг ипотека керээлери чардынган. Тываның Баштыңы Владислав Ховалыг МАКС мессенджерде бодунуң каналынга чылда 2 хуу ставкалыг «Өг-бүлениң ипотеказы» регионалдыг программа күүселдезиниң түңнелдери-биле үлешкен. Чурттакчылардан билдириишкиннерни февраль 6-дан хүлээп эгелээнден бээр чээли керээлеринче 1267 билдириишкин кирген.
Ажаалга банкызы шупту киирген билдириишкиннерниң 600-үн, азы 47 хуузун апрель 30-ге чедир бадылаан. Программа киржикчилери-биле 299 чээли керээлерин чарып, чурттаар оран-сава садып алырынга 1,5 млрд ажыг рубльди үндүрген. Амгы үеде арткан билдириишкиннерни сайгарып, керээлерни долдуруп турар.
«Чуртталга тудуу темпизин салбаан. Бо чылын 80 муң ажыг дөрбелчин метр ниити шөлдүг 23 бажыңны дужаары планда көрдүнген. Кызылда амгы үениң «Өг-бүле», «Мөңгүн», «Өлчей», «Победа» чаа чуртталга комплекстери туттунуп, найысылалды улам аян киирер» — деп, Владислав Ховалыг демдеглээн.
Бо чылын «Спутник» микрорайонунда «Семейный» чуртталга комплекизинге 106 квартираны, «Мөңгүн» микрорайонда 770 квартираны, «Победа» чуртталга комплекизинде 100 квартираны дужаар. Чаа туткан 1718 квартираны садыпкан болза, 1819 квартираны ам-даа садып турарын тудуг чери дыңнаткан. 13 тудуг компаниязы 188 муң дөрбелчин метр ниити шөлдүг, 4132 квартиралыг, хөй каът 60 бажыңны тудуп турар болгаш, Тываның ипотека программазының киржикчилерин чаа оран-сава-биле 2026 чылда хандырарынга белен. Тываның Баштыңы регионнуң социал-экономиктиг хөгжүлдезинге чуртталга тудуунуң хөгжүлдези чугула черни ээлеп турарын демдеглээн.
«Чиигелделиг ипотека – хөгжүлдениң күштүг шимчедикчизи-дир. Программа бизнести деткип, чаа ажылчын олуттарны тургузуп, а эң-не кол чүүл – бистиң хоорайывыстың аян-хевирин чаартып, амгы үениң чуртталга бажыңнарын кылып турар»— деп, ол демдеглээн.
2 хуулуг чиигелделиг ипотека программазы 2023 чылда Тывада бир дугаар ажылдап эгелээнин сагындыраал. Эгезинде ону республиканың 2359 чурттакчызы ажыглаан. Регион чуртталга тудуунуң хемчээли-биле совет үениң көргүзүүн ажып, чурттаар оран-саваны ажыглалче киирер талазы-биле Россияда лидерлерниң аразынче кирген.
Россияның Президентизи Владимир Путин Тываның Баштыңы Владислав Ховалыгның дилээ-биле ук программаны республика девискээринге узаткан. Ооң түңнелинде 2025 чылда 400 муң ажыг дөрбелчин метр ажыг чуртталга тудуун ажыглалче киирип, рекордту тургускан. 2026 чылда Тывада «Өг-бүле ипотеказы» программаның үшкү чалгыы эгелээн болгаш, аңаа хереглел улуг болуп арткан.
А. ОНДАР белеткээн.
Чурукту ТР-ниң Чазааның парлалга албанындан алган.
“Шын” №17 2026 чылдың май 7
"Шын" солуннуң МАХ-каналынга каттыжыңар max.ru/join/egenQ...