«Алдарның» бичии мөгелери
Бичии мөгелер аразынга чаңчыл болган Наадым хүрежи бо чылын Республика хүнү август 15-те болуп эрткен. Наадым 2026-га тураскааткан республика чергелиг бичии болгаш элээди мөгелер аразынга 5 аңгы хевирге 688 оол хүрешкеннер.
Бо маргылдаага “Алдар” хүреш өргээзиниң чедиишкиннерин демдеглевес арга чок. “Алдар” хүреш өргээзи баштайгы эжиктерин 2018 чылда ажыткан. Ооң үндезилекчизи, тургузукчузу, удуртукчузу – Наадымнарның 10 дакпыр түңнел хүрештерниң киржикчизи, 4 дакпыр тиилекчизи, 6 дакпыр үжүүрлешкен Тываның Күчүтен мөгези Кара-Сал Эрес.
2011-2020 чылдарда төрүттүнген оолдар аразынга «Алдар» хүреш өргээзиниң мөгелери түңнелинде шүглүп үнгеннер. Бо хире түңнелге чедир ажылдап чоруур дээрге, чоргаарал болгаш алдар-дыр.
Эң бичии 2019-2020 чылдыг мөгелер аразынга 5-8-ки черни Айбес Доржу; 2017-2018 чылдыг оолдар аразынга
1-ги черни Чаян Дагба, 2-ги черни Рамзан Монгуш,
3-4-кү черлерни Отчугаш Донгак база Сангэ Сат алганнар, 5-8-ки черни Наран Хертек; 2015-2016 чылдарның оолдар аразынга 1-ги черни Аккыс-оол Сайын-Белек, 2-ги черни Сая Куулар, 3-4-кү черлерни Күдер Ховалыг, 5-8-ки черни Тамерлан Ондар алган; 2013-2014 чылдыг оолдар аразынга
2-ги черни Аймонд Самдан, 3-4-кү черлерни Демьян Кушкаш база Айдың Куулар үлешкен, 5-8-ки черни Аюш Салчак; 2011-2012 чылдарның оолдар аразынга 1-ги черни Лопсан Монгуш, 3-4-кү черни Аюш Серээдер, 5-8-ки черлерни Ай-Белек Хертек база Алан Монгуш алган.
Аныяк-өскеннер аразынга кадык-чаагай амыдыралды, оларның спортче сонуургалын оттуруп, суртаал ажылдарын чорудуп, тыва национал хүреживисти сайзырадып чорууру дээш, “Алдар” хүреш өргээзиниң тренер башкыларынга, удуртулгазынга ам-даа сайзыралды, тиилелгелерни күзедивис!
Дөгээ кырынче үнүүшкүн
Республика хүнү август 15-те Дөгээ кырынче дүрген маңнап үнери-биле маргылдаа болуп эрткен. Чаңчыл болган маргылдаа бо удаада 4 бөлүк аразынга болган. Баштай 18 хар чедир оолдар-уругларга, дараазында спортчулар шылгарааннар.
Оолдар аразынга Тандар Ондар 20 минута 39.49 секунда эң эки үени көргүзүп, 1-ги черге төлептиг болган. Ийи дугаар черни 21 минута 35.29 секунда көргүскен Ай-Мерген Дамбый, 3-кү черни 23 минута 01.88 секунда халааш, Болат Саая алганнар. Уруглар аразынга 22 минута 01.88 секунда үелиг Ангырак Монгуш 1-ги черге төлептиг болган, 2 дугаарын 28 минута 50.66 секунда халааш, Надежда Санчы база 3-кү черни 31 минута 33.30 секунда маңнаан Айгуль Ондар үлешкеннер. Дараазында 18 хардан өрү эр-херээжен спортчулар аразынга шылгарааннар. Эр улус аразынга 27 минута 16.36. секунда иштинде эки халааш, 1-ги черге Айыр-Санаа Монгуш төлептиг болган.
Дараазында Чойган Тогаачы 2 дугаар черни 28 минута 09.56 секунда база 3-кү черни 30 минута 50.82 секунда маңнааш, Сай-Хаан Ооржак алганнар. Херээжен спортчулар аразынга 37 минута 18.81 секунда иштинде, 1-ги черни база 2 дугаарын 38 минута 50.79 секунда халааш, Сюзана Дыдый-оол үлешкеннер.
Шаңнал кирген спортчуларга медаль, диплом база өртектиг белектерни тывыскан. Спортчуларга эки түңнелдерни база эки үлегерни көргүскени дээш, изиг байырны чедирдивис.
Арзылаң Шагдыр делегей чемпионадынга киржир
Россия чемпионадының түңнелдери-биле бистиң мөгевис Арзылаң Шагдыр элезин кырынга хүрежир делегей чемпионадынга киржир эргени алган. Чемпионат август 26-27 хүннеринде Баку хоорайга болур. Ол чемпионатка Арзылаң Шагдыр 60 килге 23 чурттуң мөгелери-биле хүрежири билдинген. Арзылаңга эки белеткелди база тиилелгени күзедивис.
Дзюдоистерниң чедиишкиннери
Красноярск хоорайга август 14-16 хүннеринде Россияның алдарлыг тренери А.А. Шпанагелге база Россияның алдарлыг тренери В.Н. Назаровка тураскааткан улуг улус аразынга база 21 хар чедир мөгелерниң Бүгү-россия чергелиг маргылдаалары болуп эрткен. Маргылдааның кол сорулгазы – “Дзюдону школаже” деп төлевилелди боттандырары база Россия чемпионадынга киржир эргени чедип алыры болур.
Аңаа улуг мөгелер аразынга 1-ги черлерни 60 килге Делег Ондар база 66 килге Долаан Суван, 3-кү черни 60 килге Мөнге Данзы-Белек алганнар. Октябрь 13-19 хүннеринде Россия чемпионадынга Делег Ондар биле Долаан Суван хүрежир эргени алган.
Дараазында 21 хар чедир мөгелер аразынга 60 килге 3-кү шаңналдыг черлерни база хүлер медальдарны Мөнге Данзы-Белек биле Дозураш Бакаа үлешкеннер. Дараазында 5 дугаар черлерни 55 килге Дамдын Иргит биле 66 килге Начын Күжүгет алганнар.
Россияның Дзюдо федерациязы хоочун тренер башкы Канчыыр Сандаковка “Алдын кур” деп эң бедик шаңналды тывыскан.
Боксёр Чаян Ланзыы
Челябинскиге август 3-8 хүннеринде бокска Россияның спартакиадазы болуп эрткен. Аңаа Россияның 19-40 хар чедир шупту шыырак боксёрлары күжүн хынап киришкеннер. Спартакиаданың түңнелинде бистиң боксёрувус Чаян Ланзыы хүлер медальга төлептиг болган. Чаянга удавас болур Россия чемпионадынга эки белеткелди база чүгле тиилелгени күзеп курайладывыс!
Алексей ЧАМБАЛ-ООЛ, спорттуң хоочуну.
Чуруктарны Тыва спорт каналдан база ТР-ниң Спорт яамызының социал четкиде арнындан алган.
«Шын» №32 2026 чылдың август 20
"Шын" солуннуң МАХ-каналынга каттыжыңар: max.ru/channel_shyn