Кызылдың А.Б. Чыргал-оол аттыг уран чүүл колледжизиниң чурулга салбырының “Уран чурулга” мергежилин доозуп турар сургуулдары диплом ажылдарын чедиишкинниг камгалааннар.
Келир үениң чурукчуларының кылган уран чогаадыкчы ажылдары бот-боттарынга дөмейлешпес, кончуг солун боорда, ажыл бүрүзүн чуруп тургаш, жанр аайы-биле шын техниканы ажыглап, бедик деңнелде сургуулдарның төлептиг күүседип шыдаанын комиссия эскерген.
Доозукчу бүрүзүнүң диплом ажылы – өңнер, хевир-дүрзүлер, композицияны ажыглап тургаш көргүскен кончуг солун төөгү кылдыр үнелеттинген. Доозукчулар боттары ол ажылдарын камгалаарда, комиссияга чедингир кылдыр тайылбырлап берип турганындан авторларның бот-тускайлаңын, онзагай көрүжүн башкылар болгаш чалаттырган специалистерден тургустунган комиссия билип алган. Олар келир үениң чурукчуларындан сонуургаан айтырыгларын салып, чамдык черлерге чөптүг шүгүмчүлелди кылып тургаш-даа, доозукчуларның чураан чуруктарының эң-не күштүг талаларын демдеглээрин база утпайн турганнар.
Ниитизи-биле колледжизиниң доозукчулары дипломнарын чедиишкинниг камгалап алганнар. Оларны каш чыл дургузунда могаг-шылаг чок билиин дамчыдып өөреткен башкыларының профессионал күш-ажылы хилис барбаан дээрзин сургуулдар бадыткап каан.
Бистиң корр.
Чуруктарны болгаш медээни А.Б. Чыргал-оол аттыг уран чүүл колледжизиниң соцчеткиде арнындан алган.
“Шын” №22 2026 чылдың июнь 11
"Шын" солуннуң МАХ-каналынга каттыжыңар: max.ru/join/egenQ...