Июнь 16-да Тос эртине аттыг арт-девискээрге РФ-тиң алдарлыг артизи, ТР-ниң улустуң артизи Анзат Кууларның “Мээң театрым” деп номунуң таныштырылгазы болган.
Солун кежээни Тываның В. Көк-оол аттыг национал хөгжүм-шии театрының артистери Аржаана Стал-оол, Саяна Сат, Надежда Салчак солун оюн-көргүзүг-биле эгелээн. Ном актаан кежээни башкарып эрттирген Эрик Донгак тыва театрның сураглыг артизиниң номун бир чыл дургузунда орус дылче очулдурар ажылга киришкенин чугаалаан: “Россияның алдарлыг артизи, Тываның улустуң артизи Анзат Шожал-Доржуевна бодунуң бижээн номунда бичиизинден тура театр делегейинче чедип келгенинден эгелээш, тыва театрның үндезилекчилериниң дугайында янзы-бүрү дыка онза сактыышкыннарны бижээн. Ол чараш номну онзазынып үнелээш, изиг күзеливис-биле орус дылче очулдурар деп шиитпирлээн бис. Ол ажылды чыл дургузунда кылгаш, немээр чүүлдерни немеп тургаш, орус-тыва ийи дылда үнген номну бөгүн театр ажылдакчыларынга, көрүкчүлерге, номчукчуларга артистиң мөгейикчилеринге таныштырып турарывыс бо”.
Номда чүгле авторнуң бодунуң допчу намдарының дугайында эвес, а тыва театрның эң-не баштайгы таваан салган улуг артистериниң сценадан дашкаар кандыг турганын бижип турары үнеленчиг. Кайда-даа бижиттинмээн солун сактыышкыннарны ам-на номда кииргени, үне чок төөгү кылдыр санаттынар. Тыва театрның үндезилекчи салгалының дугайында билип алырынга амгы болгаш келир үениң салгалдарынга бо ном кончуг ажыктыг быжыг көвүрүгнү тургузар дээрзи билдингир. Бүгү назынында Тываның кол сценазынга бодунуң байлак чогаадыкчы чуртталгазын бараалгадып, хөй-хөй шиилерде солун овур-хевирлерни уттундурбас кылдыр ойнап чоруур артистиң бо ному ооң хөй-хөй чылдар дургузунда чонга бараалгадып чоруур чогаадыкчы ажылының түңнели болуп турар.
“Мен бодум ном бижиир-даа дивээн мен, ындыг бодал бажымга-даа турбаан. Анаа кады ажылдап чорааным өгбелерим, театрның улуг артистериниң дугайында, гастрольдап чораан үелеривисте, сценадан дашкаар амыдыралывыста кандыг солун таварылгалар болуп турганын сактып, бижип турган мен. Ол ышкаш Кызылдың 9 дугаар гимназиязынга 20 ажыг чыл театр бөлгүмүн удуртуп тургаш, уругларга шиилер салыр апаар таварылгаларда, айыткан бир-ле темага тааржыр 20-30 минутаның кыска шиилери тывылбастай бээрге, бодум шиилер бижиир ужурга таваржып турдум. Ол шиилерни база номда киирген мен. Мээң оомну көргеш, чогаадыкчы бөлүк орус дылче очулдурганнар. Түңнелинде, мындыг ном чырыкче үнгени бо” – деп, номнуң автору Анзат Шожал-Доржуевна чугаалаан.
Болган кежээге артистиң кады ажылдап чоруур коллегалары, удуртукчулары, эш-өөрү сагыш-сеткил көдүрлүүшкүннүг эки күзээшкиннерни чугаалап, тыва театрның хөгжүлдезинге Анзат Кууларның киирген үлүг-хуузун бедии-биле үнелээннер. Оларның бирээзи хөйге билдингир хөгжүмчү Томас Монгуш бодунуң амы-хууда амыдыралында Анзат Кууларның чогаадыкчы ажыл-ижи үлегер болуп, уран чүүлче сорук кииргенин чугаалаан.
Ыр-шоор, сеткил сөңү – шүлүктер ол кежээ улай-улай куттулуп турган. “Өпейлиимден өзүп келген, өндүр улуг театрымны” деп улуг экранда бижик артистиң ажыл-амыдыралының утказы болган театрынга кайы хире ынаан, кайы хире камныын бадыткап турган.
Ол хүн болган солун кежээниң киржикчилери “Мээң театрым” деп чаа номну холга тудар эң-баштайгы аас-кежиктиг номчукчулары болган.
/ Арынны
Cорунза МОНГУШ белеткээн.
Медээ болгаш чуруктарны ТР-ниң Культура яамызындан алган.
“Шын” №24 2026 чылдың июнь 25
"Шын" солуннуң МАХ-каналынга каттыжыңар: max.ru/join/egenQ...