| АМЫДЫРАЛДАН ЭСКЕРИГЛЕР |
Бир эвес чаныңарда эжиңер ажыл-агыйжы айтырыглар орнунга, кеткен хевиңерже артык кичээнгей салыр, чарашсынар, кайыын садып алганыңарны, чеже өртектиг болганындан эгелээш, амы-хууда амыдыралыңарда чүү болуп турарын безин бо-ла айтыра бээрин эскерип кагзыңарза, эжиңерде адааргал тыптып келген-дир деп билип алыңар. Шак ындыг улус-биле эдержир хамаанчок, үр чанынга турган ажыы чок. Болдунар болза, шуут эдеришпейн баарын кызыдыңар.
Бир эвес эки таныырыңар кижи ужурашкан санында аарыг-аржыының дугайында, кандыг эмнер ижип, кандыг эмнелге барып турарын тодаргай чугаалап азы чок болган кижилерни орнукшутканын хөөреп туруп бээр болза, дүрген-не чугааны өскертип, агаар-бойдус, каттырынчыг кино, чечектер-даа дугайында солун темаже алаактырыптыңар. Чүге дээрге өске кижиниң аарыг-аржыы силерже халдап болур, а силерге хамаарышпас улустуң ажыг-шүжүү артык чүък апаар.
Бир эвес сеңээ ийи кончуг чарылбас эжишки бот-боттарының дугайында “Ол кижи сени ынча диди, мынча диди...” деп эжиниң артынга артык чугаа дамчыдыксаар болза, ол ийи эжишки кады хоптажып олурган болганда, ёзулуг хопчулар ийи боду болур. Кайызы-даа шынчы эвес дээрзин боттары-ла бадыткааны ол болур. Эки эш эжин кажан-даа бактавас. Ынчангаш ол ийи бот-боттарын ажыглажыр “меге эжишкилерден” ырак чорааны дээре. Олар боттарының өөдежогунуң дугайында хүнү кээрге, бот-боттары сөглежип чарлыр.
Бир эвес амы-хууда сеңээ берген белекти, боодал чечекти-даа болза, өске кижи билбээчеңнеп алгаш баар болза, аңаа кажан-даа хомудава. Канчап билир сен, та сээң хилинчээң үлежип апарган боорун.
Бир эвес чаныңарда кижилерни, болуп турар болуушкуннарны таптыг кичээнгейлиг сайгарып, кыдыындан топтай бээр болзуңарза, ында солун чүүлдерни хөйнү эскерип каар силер.
Чурукту ГигаЧатка чураан
“Шын” №21 2026 чылдың июнь 4
"Шын" солуннуң МАХ-каналынга каттыжыңар: max.ru/join/egenQ...