Республикада спорт инфраструктуразын хөгжүдер болгаш чурттакчы чоннуң идепкейлиг болгаш кадык амыдыралынга чогуур байдалды тургузар талазы-биле ажыл уламчылавышаан.
Ажык дээр адаанда бүрүн дерилгелиг амгы үениң спорт шөлдери туттунуп турар. Республикага бо чылын он ындыг шөлчүгеш немежир, оларның чамдыызы Тываның найысылалынга туттунар. Регионнуң Чазаа биле Сбербанкының аразында дугуржулга ёзугаар ук төлевилел боттанып эгелээн. Шыңганнарны сайзырадыр чугула тренажёрлар, бокс дериг-херекселдери болгаш канаттар-биле спортчу шөл бүрүзү дериттинер. Чаа объектилерни профессионал тренерлер болгаш хоорайның чурттакчы чону “эки” деп үнелеп турар.
Кызыл хоорайның чурттакчызы Онзагай Моңгуш Титов кудумчузунуң 23 дугаарлыг бажыңының девискээринге хамаарыштыр чугаалаан: “Чоокта чаа маңаа ээн куруг чер турду. Бөгүн мында арыг агаарда ёзулуг-ла спортчу хоорайжыгаш турупту. Даң бажындан орай кежээге чедир улуг-биче чон маңаа кээп, дериг-херекселдерниң дузазы-биле сула шимчээшкиннерни кылып, кадыкшылын быжыктырып ап турар. Ажык дээр адаанда спортчу шөл – улуг-биче чоннуң чыглыры сорунзалыг чер болу берди”.
Шөлде дериг-херекселдер профессионал спортчуларны безин кайгадып турар. Мында шупту шыңганнарга күш-шыдалдың болгаш хан-дамыр быжыктырар 11 тренажёр, брустар, халбактанып үнер канат болгаш бокс грушазы-биле дериттинген. Шупту дериг-херекселдерни заводка бүдүрүп үндүрген, сертификаттарлыг болгаш агаар-бойдустуң кандыг-даа байдалынга таарыштыр кылдынган. Чанында дыштаныр эптиг сандайларны салган, тренажёр бүрүзүнде айыыл чок чоруктуң инструкциязын көргүскен.
Бо бүгү дээрге Тываның Чазаа биле Сбербанкының аразында кады ажылдажылгазының түңнели-дир. Эрткен чылын база-ла кады ажылдажылганың ачызында Кызылда ийи, Ак-Довуракта бир дээш ниитизи-биле үш спортчу шөлдү туткан. А 2026 чылда бүдүн республикага 10 комплексти тудары планда көрдүнген. Найысылалда 3, 9 база 15 дугаар школалар чанында, оң болгаш солагай талакы эриктерде база Титов кудумчузунда, шупту 6 девискээр белен. Удавас Иркутская кудумчузунда чеди дугаар шөлдү белеткеп эгелээр.
«Бо шөлчүгештер дүне-хүндүс дивейн ажылдап турар. Маңаа күзелдиг кижи бүрүзү кайы-даа үеде келгеш, дериг-херекселди ажыглап, сула шимчээшкиннерни кылып ап болур. Кижилер бодунуң кадыкшылынче кичээнгей салзын дээш, оларга кылдынган дериг-херекселди үрей бербейн, камныг эдилээри чугула” – деп, «Тиилелге» спорт-культура төвүнүң тренери Буян Чооду чугаалаан.
Республиканың Баштыңы Владислав Ховалыг хоорайның төвү-даа, дачалар-даа, ырак-узак кожууннар-даа болза, Тываның чурттакчы бүрүзүнге кылаштап чеде бээр хире черге спорт шөлдери турар ужурлуг деп чаңгыс эвес удаа демдеглээн. Мындыг кудумчу шөлчүгештериниң тыптып келгени аныяк-өскенге кадык болгаш күштүг келир үени шилип алырынче дорт орукту ажыдар.
/ Бистиң корр.
Чурукту ТР-ниң Чазааның парлалга албанындан алган.
“Шын” № 39 2026 чылдың октябрь 8
"Шын" солуннуң МАХ-каналынга каттыжыңар: max.ru/channel_shyn