Күс дүжүп, агаар-бойдус өл-шык, сериин апарганда, улуг-бичии кижилер бо-ла чөдүре бээр. Грипптиң эгелээр үези база бо. Кончуг чыпшыныычал, халдавырлыг бо аарыг кижилерге дыка халалыг – чөдүртүр, эъди изиир, шагзыраар. Эм садыгларында аар өртектиг антибиотиктер дузалыын дузалыг, ынчалза-даа өгбелеривистиң ажыглап чораан арга-сүмелери база дузалыг дээрзин билип алыры артык эвес.
Чижээ, эм шынарлыг кылдыр санадыр чокпак үнүш – артыштың дузазы хөй. Антисептик ажыглаарының орнунга, артышты хайындыргаш, бичии чаштырар шилге куткаш, ооң-биле каяа-даа баргаш, холун, арнын чуп ап чоруур болза, микробтар чыпшынмас. Артыштыг сугну думчук аксынга чаап, аас иштинге элээн тудар. Хөй улус аразынче кирерде, кургаг артышты дайнап алырга, аас иштиниң багай чыды чидер.
Ол ышкаш артыш, бир талазында, арыглаар. Ийи талазында, артышты үргүлчү ап алгаш, каяа-даа артыжанып чоруур болза, ооң чыдындан аарыг-аржык, айыыл-халап халдадыр каржы күштер чагдап шыдавас боор. Артыштың каттарын мойнунга чинчигилештир дизип алгаш, астып чоруурга, камгалал болур дээр.
Шаанда өгбелеривис хүн ажа бээрге, артыш кывыспас деп чагып чораан. Ол ышкаш тайга черден артыш чалап алырда, ону дазылындан тура тыртпас, хоптактанып хөйнү албас, хереглээнин өйлей кезип алыр. Оон башка ол черден келир чылын артыш өспейн баар.
“Шын” №40 2026 чылдың октябрь 15
"Шын" солуннуң МАХ-каналынга каттыжыңар: max.ru/channel_shyn