Апрель 24-те найысылал Кызылга Тываның күрүне университединиң баазазынга “Чаңгыс демниг Россия партиязының Аныяктар гвардиязының” баштайгы салбырының албан ёзугаар ажыдыышкыны болган. Шак бо болуушкун студентилерни, дээди өөредилге чериниң удуртулгазын болгаш чазак-чагырганың төлээлерин каттыштырган.
Өөредилге чылының эгезинде ТывКУ-нуң ректору Ольга Хомушку “Аныяктар гвардиязы-биле” кады ажылдажылга дугайында дугуржулгага атты салган турган. Дээди өөредилге чериниң студентилери-биле кады ажылдаарының дугайында чугаалашкан түңнелинде ук гвардияның баштайгы салбырын частан бээр ажыдар деп шиитпирни хүлээп алганнар. Ол амгы үеде чедиишкинниг боттанган.
“Аныяктар гвардиязының” баштайгы салбырын ажыдар байырлыг хемчегге ТР-ниң Аныяктар ажыл-херектериниң сайыды, Россияның Маадыры Буян Куулар база киришкен. Аныяктарга “Чаңгыс демниг Россия” партиязын таварыштыр хоойлужудулгаже үлүг-хуузун киирип болур аргалар барын ол онзалап демдеглээн.
“Бис бөгүн "Чаңгыс демниг Россия" партиязының Аныяктар гвардиязының” баштайгы салбырын ажыдып тур бис. Аңаа бо шимчээшкинниң киржикчилери боттарының ээлчээнде “Улусчу программаже” кирер боттарының саналдарын киирип болур. Бистиң республиканың аныяктар политиказын моон соңгаар боттандырары-биле база ылаңгыя бистиң аныяктарывыстың хөгжүлдези дээш олар-биле ажылдаар бис” – деп, Буян Куулар чугаалаан.
Бичии курстуң база келир үеде бо адырга ажылдап болур төөгү факультединиң студентилери чаа каттыжыышкынның кол өзээн тургузар дээрзин ТывКУ-нуң аныяктар политиказының талазы-биле проректорнуң хүлээлгелерин күүседип турар Мария Сергеева демдеглээн: “Бирги ийиги курстуң база келир үеде аныяктар-биле ажылдаар үшкү курстуң студентилери салбырның кежигүннери болур. Студентилерни тускай белеткээн программа ёзугаар ниитилел-политиктиг болгаш хамааты-патриотчу хемчеглерже хаара тудар. Оларның аразында национал төлевилелдерни шимчедири чугула угланыышкын болур. Чижээ, чоокта чаа партияның деткимчези-биле “Таарымчалыг хоорай хүрээлеңи” деп төлевилел эгелээн. Ооң соонда “Аныяктар болгаш уруглар” деп төлевилел чоруп олурар. Бо чүүл студентилерге хемчеглерни организастаар талазы-биле профессионал арга-дуржулгазын сайзырадып, республикадан дашкаар, ылаңгыя Сибирь федералдыг округта политиктиг төлевилелдер-биле таныжып алырынга дузалаар”.
Төөгү факультединиң “Аныяктар-биле ажылды организастаары” деп угланыышкынның 3-кү курузунуң студентизи Сайдаш Хомушку салбырның ажылындан чүнү манап турары-биле үлешкен: “Өске эге салбырларның чижээн эдерип, бо адырга идепкейлиг киржирин оралдажыр бис. Россияның политиктиг амыдыралынга студентилер чугула херек деп бодап тур мен. Ынчалза-даа студентилерден аңгыда, бис школачыларны болгаш 14 хардан өрү назылыг Россияның кандыг-даа хамаатыларын хаара тудар бис. Кол-ла чүве аныяк кижи политиктиг амыдыралче чүткүлдүг болгаш ону бодунуң сорулгазы кылдыр көрүп турары. Амгы үеде Россия Федерациязының чаа регионнарынга гуманитарлыг дузаны чыып турар бис”.
ТывКУ-га шак мындыг салбырның ажыттынганы студентилерни политиктиг ниитилелге чаңчыктырар чаа шөлчүгеш болур болгаш регионнуң аныяктар политиказының талазы-биле кадрлар курлавырын белеткээр арга-дыр.
Чыжыргана СААЯ белеткээн.
“Шын” №16 2026 чылдың апрель 30
"Шын" солуннуң МАХ-каналынга каттыжыңар max.ru/join/egenQ...